Dixebra pon el ramu a la xira 30 aniversariu con una fiesta-conciertu que va servir de despidida de dellos cantares

|
Cartelu fiesta-conciertu 30 aniversariu de Dixebra

“Va ser la oportunidá última de sentir dellos temes en direuto, que vamos xubilar”, anuncia Xune Elipe. El vienres, na uviedina Sala Tribeca, Dixebra va poner el ramu a la xira 30 aniversariu no que va ser “un puntu y aparte” na trayeutoria de la banda.

Tres un añu cargáu de conciertos, iniciatives como’l proyeutu ‘Dalgo vieyo, dalgo nuevo, dalgo emprestao’ que finalmente s’edita nun discu non destináu a la venta comercial o una botella de sidra conmemorativa, y el recordatoriu en redes sociales de dalgunos de los momentos históricos del grupu, Dixebra quier axuntase colos sos siguidores nuna sala pa celebrar una fiesta-conciertu que sirva pa poner el ramu a un 2017 mui especial pa los avilesinos. Asina, a les 21.30 hores, ta previstu’l comienzu d’una cita que “va ser la oportunidá última de sentir dellos temes en direuto, que vamos xubilar; da-yos un respiru”, afirma Elipe.

Y ye que 2018 va suponer una etapa nueva pa Dixebra, “un puntu y aparte”. “La idea que tenemos ye la de remocicar el repertoriu pa la siguiente temporada y empezar col procesu creativu de cara a un discu orixinal”, adelanta’l cantante.  

EP pa tolos asistentes

L’EP ‘Dalgo vieyo, dalgo nuevo, dalgo emprestao’, inclúi los cantares ‘Da-yos caña’ ('Dalgo vieyo'), ‘Sigue'l tren’ ('Dalgo nuevo'), ‘Adiós, Cordera» ('Dalgo emprestao', versión versión de la canción tradicional irlandesa ‘New York girls’ basáu na del grupu Oyster Band) y ‘Esto ye Asturies’ ('Dalgo vieyo bis'). Ésta última trátase de la versión d'esti tema que la banda fai en direuto del cantar incluyíu nel discu ‘Dieron en duru’.

Dixebra tenía en mente regalar esta grabación a les 300 primeres persones que mercaren la entrada pal conciertu que sirve de pieslle al ‘Tour 87-17’, pero dada la demanda esistente finalmente decidió ampliar la tirada y, asina, tolos asistentes van poder recibir ún. Otru aliciente, entovía pendiente de confirmar, ye’l posible sortéu de botelles de sidra de Fanjul con una etiqueta especial con una estrofa de ‘Canciu d’amor’ que sacó la banda en conmemoración del 30 aniversariu.

El preciu de la entrada pa la fiesta-conciertu de Dixebra ye de 10 euros, anticipada, y de 14, na puerta. Los puntos de venta son los siguientes: L'Esperteyu (Uviéu), Trisquel (Xixón) y El Cafetón (Avilés).

Contador Estadistiques