Dixebra, Felpeyu y N’Arba van actuar nel XXV Conciertu pola Oficialidá

El Conciertu pola Oficialidá celebra’l sábadu 8 de xunu nel Parque Inglés de Xixón la so edición númberu 25. Nesta ocasión tán especial va contar coles actuaciones de Dixebra, N’Arba, Felpeyu, La Tarrancha, La Bandina y Dani Stylo.

Un añu más, Dixebra van ser los encargaos d’encabezar el festival. La mítica banda avilesina namái se perdió dos ediciones, les dos por falta xustificada, nos 25 años de vida del conciertu qu’entamen la Xunta pola Defensa de la Llingua Asturiana y Xunta Moza, al qu’acompañaron de manera fiel dende la so conceición. El cartelu complétase col folk de N’Arba, Felpeyu y La Bandina, el ‘mecigayu-ska’ de La Tarrancha y los ritmos hip hop de Dani Stylo. Los artistes reivindicarán la oficialidá del asturianu sobre l’escenariu al traviés de la so música y nun ambiente festivu.

El conciertu va principiar a les 19.30 hores nel Parque de los Hermanos Castro de Xixón, conocíu de manera popular como’l Parque Inglés. Les entraes van costar 8 euros en casu de que se merquen per anticipao, o 10 si s’alquieren na puerta de la carpa. Éstes tán a la venta en L’Esperteyu y Cervecería Mala Strana (Uviéu); Café Trisquel y Sidrería Canteli (Xixón); El Cafetón y Queen Maeve (Avilés); La Gueta (Candás); Mesón Cervantes (Tinéu); El Azul (Cangas); L’Abellugu (Mieres); La Palmera (La Pola Ḷḷena); Abre César (La Pola Siero); Pub Piero’s (Grau); La Traviesa (L’Infiestu); y el CSA La Semiente (L’Entregu).

Otra manera, na selmana anterior al conciertu, la Plaza'l Pescao d'Uviéu va acoyer una esposición con dellos materiales y los cartelos de les 25 ediciones d'esti festival, pol que pasaron casi 70 formaciones. La inauguración va tener llugar el 4 de xunu, a les 20 hores.