Dixebra comprométese a facer un discu en directo

Dixebra anduvo ayeri de promoción del so últimu trabayu discográficu "Ensin Novedá". Una presentación a los medios na sede de la SGAE y una actuación promocional na FNAC de Siero apurrieron bien de noticies fresques sobre la banda avilesina.

Ello ye qu'el grupu de Xune Elipe aprovechó la ocasión pa presentar el primer videoclip promocional d'esti "Ensin novedá" nel que partiendo de la lletra y música del tema "El manteru" el realizador asturianu Guillermo Blanco desarrolló un simpáticu video con parte grabada nos conciertos más de recién de la banda y con otra parte dramatizada na que s'enseña la hestoria d'un manteru que se gana la vida vendiendo pela cai discos pirates del mesmu grupu Dixebra.

Los miembros del grupu comentaron na presentación del discu qu'esti "Ensin novedá" foi ún de los trabayos más ellaboraos de la banda y de los que más tiempu llevó'l sacar alantre, contando'l guitarrista "Primi" Abella l'anécdota de que'l riff de guitarra del tema "vieyu combatiente" yá lu tenía compuestu dende va cerca de dos años como exemplu ilustrativu del procesu llaboriosu que llevó a esti discu. .

Xune Elipe anunció tamién que en pasando tola promoción y vida en mercáu d'esti "Ensin Novedá" el siguiente proyectu de Dixebra va ser un discu grabáu en directo, claro que por de pronto lo primero ye l'axenda de conciertos que tienen per delantre los Dixebra: Llanes, Siero, Lugo y Soria son les siguientes paraes del so tren.