Dixebra celebra n'Uviéu los sos trenta años d’activismu musical con un conciertu especial d'aniversariu

|
Dixebra celebra n'Uviéu los sos trenta años d’activismu musical con un conciertu especial d'aniversariu

Les fiestes uvieínes de San Mateo van ser el marcu nel que Dixebra va celebrar na madrugada del domingu al llunes el conciertu especial pol so trenta aniversariu sobre los escenarios. L’actuación, que va siguir la llinia de la del Interceltique de Lorient, va contar con collaboraciones y delles sopreses, y va grabase n’imaxe y audiu.

Uviéu garra’l relevu de Corvera y Avilés, onde Dixebra festexó’l son décimu y ventenu aniversariu, y pon la plaza la Catedral pa celebrar los trenta años d’activismu musical de la banda referente del rock n’asturianu. Va ser el domingu a la 1 de la madrugada, tres les actuaciones Third Floor y del ex El Canto del Loco, David Otero.

El grupu avilesín va ufrir un conciertu mui asemeyáu al que dieron nel Festival Interceltique de Lorient, coles collaboraciones de los hermanos Tejedor (gaita y acordión), Rubén Bada (bouzouki y violín), Ángel Ruíz (banjo) y Toño Gómez (trombón), incorporaciones que permiten da-y un toque más folk a los cantares. A ello hai que sumar “delles sorpreses que tenemos en stand-by”, apunta’l cantante Xune Elipe, col oxetivu d’atraer a más xente nun día y horariu que nun yera’l deseáu pol grupu, anque les predicciones meteorolóxiques paecen nun ser del too males, ensin l’agua prevista pa güei.

Y ye que la intención de Dixebra ye qu’haya un bon ambiente pa que se vea reflexáu nes grabaciones que se van facer de l’actuación, tanto en videu como n’audiu, con Javier Lueje y Sergio Rodríguez, de manera respeutiva, al mando. “Entovía nun ta la idea zarrada, pero la intención ye la de sacar un DVD, non col conciertu completu como n’Avilés, sinón incorporando dalgunos temes d’Uviéu y otros del de Lorient, como la collaboración de la Bagad Lorient, contestualizándolos; analizando les lletres del grupu y la historia d’Asturies nestos 30 años”, esplica Elipe. De primeres, anque va grabase l’audiu, ta descartao que se saque en formatu CD.

Lo ‘Dalgo vieyo’: ‘Esto ye Asturies’

El DVD pol trenta aniversariu va espublizase a finales d’añu, al empar que se dea a conocer el videoclip de la versión d’Oyster Band de la canción tradicional irlandesa ‘New York girls’, que va llevar el nome de ‘Adiós, cordera’. Ésta va ser la tercer pieza que conforme’l proyeutu ‘Dalgo vieyo, dalgo nuevo, dalgo emprestao’, del que se yá se dio a conocer lo ‘nuevo’, ‘Sigue’l tren’, y del que pronto va difundise lo ‘vieyo’.

Anque nun primer momentu taba previsto que se versionara ‘Da-yos caña’, finalmente’l grupu decantóse por ‘Esto ye Asturies’, tema nel que collabora la Banda Gaites LaKadarma. Tanto ésti como’l cantar ‘emprestao’, yá tan grabaos, a falta de desendolcar la idea pa los respeutivos videoclips.

Corquiéu abre los conciertos de la plaza la Catedral

Esta nueche, a les 21 hores, Corquiéu va encargase d’abrir los conciertos de San Mateo na plaza la Catedral. Tres la banda folk de Ribeseya, van xubir al escenariu La Oreja de Van Gogh y Green Valley.

Mentes, mañana va ser el turnu de Xuacu Amieva, tamién a les 21 hores. L’actuación del gaiteru va servir pa dar pasu a Gemeliers, y Beret y Nikone.

Na semeya, un momentu del conciertu de Dixebra nel Espace Marine del Festival Interceltique de Lorient.

Contador Estadistiques