Dixebra, cabeza de cartel con Obús en Turón

La plataforma Xuvenil de Turón ta acabante de presentar el programa de la IX selmana de la mocedá de Turón, que va desarrollase del 15 al 21 d'esti mes.


Los organizadores de la selmana, que destacaron el fechu de qu'esta tuvo nun tris de nun celebrase por culpa del recorte de presupuestos del conveniu que tienen col Institutu Asturianu de la Mocedá, entamen una completa selmana d'actividaes d'ociu, culturales y deportives nes que los conciertos van tener un pesu fundamental. Trés díes de conciertos van poner la música en Turón, con otros trés estilos estremaos pa caúna de les xornaes. Asina, el primer día de conciertos va dedicase al rock, el segundu al folk y el terceru a los cantautores, too ello con especial atención a los artistes del llugar.

Los conciertos entamen el vienres 19 d'avientu cola actuación de dellos grupos de Turón entovía por confirmar y les de Dixebra y d'un de los grupos más vieyos del heavy español: Obús. Ello va ser a partir de les 23h nel Parque, escenariu nel que van tocar el sábadu los grupos folk Skanda y La Col.lá Propinde xunta'l grupu Dark la Eme, mientres que'l domingu 21 queda acutáu'l sitiu pa los cantautores Juan Castro y Alfredo González, que van actuar a les 7 de la tarde.