Dixebra torna a An Oriant un llustru depués

Cinco años pasaron dende l'actuación última de Dixebra nel Festival Interceltique de Lorient, onde la banda asturiana ye bien reconocida. Esti vienres protagoniza, a partir de les 22 hores, el 'Fest Rock' nel Espace Marine.

L'escenariu principal del certame referencia de la escena musical de raigaños celtes nel mundu torna a acoyer a los avilesinos, onde na primer xornada del Interceltique del 2009, dedicáu a Galicia, ufrieron un conciertu espectacular xunto colos llocales Les Ramoneurs de Menhirs y los galeses Taran. Nesta ocasión, Dixebra comparte tables nesti 'Fest Rock' colos bretones Red Cardell, una de les bandes más veteranes del país nesti estilu, que va facase acompañar con la Bagad Kemper.

Pa esta cita, los asturianos reincorporen a Mario Fueyo a los teclaos y presenten un repertoriu más folk de lo que tien avezáu a los sos siguidores n'Asturies. Tamién ta prevista la collaboración del músicu bretón Gaël Lefevere, componente del grupu Hiks. L'actuación va ser grabada pola canal galesa S4C, que prepara un especial sobre l'Interceltique nel que Dixebra va tener un güecu destacáu. Con ésta yá son seis les ediciones del certame bretón nel que participa la banda referencia del rock n'asturianu.