Dixebra actúa esti sábadu en Gasteiz nun festival dedicáu a les llingües minorizaes

|
Dixebra actúa esti sábadu en Gasteiz nun festival dedicáu a les llingües minorizaes

Oihaneder Euskararen Etxea entama esti sábadu la II Udaberri Jaia, festival de música dedicáu a les llingües minorizaes na que l'asturianu va tener presencia cola actuación de Dixebra. La banda avilesina va compartir escenariu colos gallegos Terbutalina.

El conciertu del sábadu, que va tener llugar a les 20.30 hores nel Falerina Lorategian, en plenu cascu vieyu de Gasteiz, pon el ramu al ciclu de llingües minorizaes Hitz Adina Mintzo, cursu que pretende "ampliar y arriquecer la perspeutiva de la realidá llingüística actual" y qu'averó a los sos participantes la situación del asturianu, el gallegu, el nawat, el galés, tamazight, el gascón y el kurdu. Nel casu del nuesu idioma, los convidaos pa esponer el momentu que ta viviendo la llingua asturiana foron Inaciu Galán, presidente d'Iniciativa pol Asturianu, y Ánxel del Río, en representación de la Xunta pola Defensa de la Llingua Asturiana.

Tres l'actuación de Dixebra va llegar el turnu de Terbutalina, grupu de garage-punk folixeru que tocó n'Uviéu'l pasáu día 1. Mentes, de tarde, los navarros Broken Brothers Brass Band van calecer l'ambiente con un pasucais peles cais de Gasteiz.

Con esti conciertu, la banda avilesina torna a los escenarios d’Eukal Herria, un país que los conoz perbién poles sos visites continuaes a lo llargo de la so trayectoria, nesta ocasión de la mano del espaciu Oihaneder Euskararen Etxea, que se define como "un llugar d’alcuentru dedicáu al ociu y a la cultura n’euskera, espaciu vivu y activu, con una programación cultural plural y un espaciu pa la creatividá", onde "toles llingües y cultures son bienveníes".

AdxuntuTamañu
Image icon cartelu_ii_udaberri_jaia.jpg113.88 KB
Contador Estadistiques