Dixebra abre xira con un conciertu en Xixón

La sala Acapulco va acoyer per primer vegada un conciertu de Dixebra. La banda avilesina va ufrir nel Casinu de Xixón el 10 de xineru l’actuación qu’abre la xira 2015, na que los temes del so trabayu últimu, ‘Tiempos modernos’, van siguir teniendo un pesu importante.

Dixebra yá defendió los cantares d’esti discu, asoleyáu en payares del 2013, mientres tol añu pasáu per Asturies y otres places de fuera del país, ente ellos An Oriant dientro de la programación del Festival Interceltique. Vieyos conocíos en Breizh, el grupu comandáu por Xune Elipe tornaron a recibir perbones critiques, catalogando inclusive a los asturianos como los Mano Negra celtes. ‘Tiempos modernos’ trátase d’un de los álbumes más completos de la formación, con lletres mui ellaboraes que repasen tanto l’actualidá d’Asturies como la internacional y estilos que van dende’l reggae o’l ska al punk, metal, folk y rap. El trabayu garra’l nome de la película de Charles Chaplin ‘Modern times’ (1936), crítica col capitalismu.

Pal conciertu de Xixón, los avilesinos van tener l’acompañamientu de Dani Antistailo, encargáu de calecer l’ambientu con una sesión especial pa la ocasión. Les actuaciones van principiar a les 21.30 y les entraes yá tan a la venta a un preciu de 10 euros –na puerta, van costar 12–. La xente interesao en mercar los tickets de manera anticipada pue facelo nos llugares siguientes: Trisquel y Llibrería Paradiso, en Xixón; L’Esperteyu y El Último Mono, n’Uviéu; y El Cafetón, n’Avilés. Según anuncia la banda, van incorporáse al set list composiciones qu’hai cuantayá nun toquen en direuto.