Diversidá d’opiniones nel asturianismu nel referendum sobre la constitución europea

menos d'un mes pa la celebración del referéndum sobre la Constitución Europea, tolos partíos políticos d'ámbitu asturianu tienen yá decidida la so posición énte la consulta, con posicionamientos que pasen per toles posibilidaes dende'l votu a favor hasta'l votu en contra pasando pela abstención. Con too y con ello, les formaciones polítiques d'ámbitu asturianu concueyen en quitá-y fierru a la trescendencia del referéndum y reconocen que van facer campañes modestes

Entamando pelos defensores del "Sí" al tratáu européu alcuéntrase la coalición PAS-URAS. Los dos partíos que formen la coalición de centru asturianista van pidi-yos el votu a favor a los sos militantes na consulta del día 20, anque como reconocen dende'l PAS, va tratase d'un "Sí" pronunciáu con poca gana. Xesús Cañedo, candidatu pol PAS nes últimes europees, declaró a Asturies.com que'l so partíu va pidir el "Sí" pero aclarió que "va ser un "Sí" escépticu y con reserves". Según Cañedo "vamos pidi-yos el sí a los nuestros militantes porque toos tamos d'alcuerdu con Europa, y amás esta constitución lo único que fai ye compilar los trataos de la UE yá esistentes y amestá-yos delles coses como los derechos humanos, colo que son too elementos de derechu que yá taben ehí, pero entendemos qu'esti referéndum llega nun momentu en que'l gobiernu busca autoplebiscitase de manera oportunista". Cañedo quíta-y importancia a la trescendencia del referéndum y diz que "anque saliere que non ello nun diba significar nada, porque la UE diba siguir ehí como la conocemos hasta agora". En cuantes a la posible campaña que vaya desarrollar el PAS nesti referéndum el militante asturianista diz que nun cuenten con facer campaña y reconoz irónicamente que "la campaña yá ta faciéndola'l gobiernu"

La opción abstencionista deféndela'l Bloque por Asturies, qu'ayeri presentó públicamente la so posición. El Bloque por Asturies diz que ye "indispensable la necesidá de refundar Europa, de dotala de regles nueves, con un nuevu contratu social y democráticu ente les sos instituciones, pueblos, habitantes y col restu de pueblos del esterior". Pal BpA la convocatoria del referéndum esmuz la cuestión principal de "Qué Europa queremos" al plantease como un referéndum pa tar "a favor o en contra d'Europa". En cuantes al testu a votar el día 20, la formación de Rafael Palacios diz que'l proyectu constitucional "continua la llinia de trataos yá esistentes" y que pretende "consagrar con pretensiones constituyentes l'espíritu tecnocráticu, neolliberal y militarista de la Unión" un espíritu contrariu al que diz defender el Bloque, "el d'una Europa social, democrática, ecolóxicamente sostenible, autónoma, pola paz, solidaria y que reconoza la realidá plurinacional y plurillingüística". Tres de toa esta argumentación, la posición abstencionista del Bloque encóntase en dellos puntos nos que llama l'atención sobre'l calter de "Referéndum-Trampa" de la convocatoria, de la que diz que "yá se sabe d'antemano'l resultáu" y que "sólo busca que los ciudadanos y ciudadanes llexitimemos un procesu con un grave déficit democráticu". La organización d'izquierdes diz que namás pue defendese l'abstención "énte una campaña institucional indigna que busca'l sí ciegu y que col dineru de toos pretende esplicar en quince díes lo que nos vienen escondiendo dende va años"

D'otra banda, dos partíos nacionalistes piden el "non" nel referéndum. En primer llugar, Andecha Astur, que xustifica la opción del votu en contra en dellos argumentos qu'esplicó p'Asturies.com Xosé Bermeyu, responsable de comunicación de la organización y candidatu pola mesma nes pasaes elecciones europees dientro de la candidatura "Europa de los pueblos". Bermeyu esplicó qu'en primer llugar la so formación posiciónase a la escontra nel referéndum porque'l testu constitucional "nun reconoz los derechos de nengún tipu de les naciones ensin estáu de la UE, lo mesmo culturales que políticos que d'otra triba". En segundu llugar, Andecha posiciónase pol "non" pol fechu de que la Constitución nun afonda nos aspectos de calter social. Según el representante d'Andecha "el tratáu constitucional fala de drechos humanos, pero nun incluye una rellación de mecanismos alministrativos pa poder cumplilos, polo que resulta un testu muncho más declarativu qu'executivu col que nun podemos tar d'alcuerdu". Finalmente pa Xosé Bermeyu "trátase d'una constitución que dexa la idea d'Europa bloqueada como la d'un conxuntu d'estaos nos que prima'l mercáu sobre otros factores de xunidá ente los pueblos d'Europa". El representante d'Andecha concluí esplicando que "oblíguennos a dicir que non con llárimes, porque a nosotros prestaríanos dicir que sí, en cuantes que creemos n'Europa, pero non na Europa que significa esta constitución". Bermeyu tamién-y quita trescendencia a la campaña y a la convocatoria, y diz que "El referéndum nun dexa de ser un esperimentu con gaseosa".

La otra opción nacionalista que s'asitia na negativa nel referéndum ye Izquierda Asturiana. El partíu que representa Naciu Llope va facer campaña pol non al considerar que la Constitución "nun ye positiva pa los porgüeyos d'Asturies como nación nin respuende a les necesidaes de les clases populares asturianes y europees". El partíu nacionalista d'izquierdes defende'l non "como espresión de refuga nun solo del testu constitucional, sinón como la impugnación global d'un procesu d'integración europea onde'l pueblu asturianu vien siendo dende va venti años namás un espectador pasivu y sufriente". El non d'IAS encóntase nuna riestra de puntos que recuerden en primer llugar que la constitución ye en realidá "un alcuerdu ente les élites de los gobiernos y non una verdadera Constitución adoptada democráticamente". El calter d'irreformabilidá de la carta magna ye otra de les pegues que ve IAS, que tamién afonda na mala articulación que se fai del conxuntu de nacionalidaes qu'igüen la UE recordando que'l testu nun atiende a "les realidaes nacionales nin a la capacidá llexislativa de les denominaes "rexones" qu'han contar siempre col Estáu como intermediariu énte la poca operatividá del totum revolutum que supón el llamáu "Comité de les Rexones"". La falta d'un modelu social européu ye otru de los puntos fuertes de la negativa d'IAS, que diz tamién que la carta impón una fiscalidá regresiva y desigual y qu'afita los grandes paradigmes neolliberales "basaos en criterios monetaristes como la flexibilización del mercáu llaboral o la inserción nel mesmu como condición pa la ciudadanía y la protección social"