Directivos de Bancu Sabadell declárense "impresionaos" pola situación del asturianu

El colectivu "Oficialidá" sigue en contactu cola directiva del Bancu Sabadell, cola que tan intentando llegar a alcuerdos pa consiguir que la casa bancaria titular del Banco Herrero entame midíes normalizadores del asturianu nes sos rellaciones colos clientes y presencia institucional. La persona cola que tan llevándose alantre los contactos ye Albert Carné, Xefe de Gabinete de la Presidencia del Bancu Sabadell y col que los representantes de "Oficialidá" atalanten qu'esiste un bon entendimientu

Ello ye que na última reunión ente Oficialidá y Bancu Sabadell llegárase al doble compromisu de face-y visible'l casu de la llingua asturiana y, pola parte del Grupu Sabadell, d'estudiar la situación asturiana p'afondar nella dende pasos posibles como'l de facer visible un billingüismu activu n'actos de calter cultural y social que desendolque anguaño la entidá financiera n'Asturies. En cumplimientu d'ello, los miembros de "Oficialidá" ficiéron-y entrega al altu mandatariu del bancu d'un estoyu de documentación sociollingüística col oxetivu de dar a conocer la problemática del asturianu y sensibilizar a los responsables del bancu. Carné declaró sentise "impresionáu" pola cantidá de bibliografía qu'hai sobre la cuestión sociollingüística y esplicó que diba metese per ello a estudialo detenidamente, una declaración que demuestra una gran receptividá y que fai albidrar esperances a los directivos de "Oficialidá".