Directiva europea nueva sobre envases

El plenu del Parlamentu Européu dio de pasu ayeri'l proyectu definitivu de directiva sobre recuperación y reciclao d'envases, que va obligar a los países comunitarios a ponese nunos oxetivos bien ambiciosos de reciclao pa d'equí al 31 d'avientu de 2008, pa cuando los miembros de la UE van tener que reciclar mínimo'l 55 por cientu de los envases que produzan. El plan pon oxetivos distintos pa cada material, y manda que se recicle'l 60% del vidriu, el 60% de papel y cartón, el 55% de les lates, el 22,5% de los plásticos y el 15% de les caxes y palés de madera.
Sicasí, la directiva diz que los envases vieyos van poder sieguir gastándose pa quemalos en centrales de corriente -lo que se conoz como "valorización enerxético"- siempre que se xustifique qu'el quemar salga más rentable qu'el reciclar

Aparte d'esta importante directiva, la Comisión Europea decidió ayeri crear etiquetes nueves pa los electrodomésticos que menos corriente gasten y que seyan menos dañinos pal mediu ambiente. Nel añu 1994 la UE dio de pasu l'actual sistema d'etiquetes, que-yos ponía lletres a los electrodomésticos acordies al gastu de corriente que facíen. Los más gastizos llevaben les lletres F o G, mientres que los que más corriente aforraben llevaben la lletra A. L'ésitu y aceptación polos consumidores eueropeos d'esti sistema de lletres llevó a la Comisión a decidir la creación de dos nueves categoríes, la A+ y la A++, y a estender el sistema d'etiquetao a más electrodomésticos, incluyendo ende neveres y llavaplatos hasta fornos