Diez mozos y moces de Llaviana alcuéntrense n’Alemaña gracies a un proyeutu formativu

Un proyeutu del Conseyu de la Mocedá de Llaviana xunto con dos organizaciones moces d’Alemaña y Italia llevaron a diez mozos del conceyu a Kelheim. El so oxetivu ye aprender a desarrollar proyeutos sociales al traviés del deporte d’aventura.
 
“Ésta ye la primer vegada que dende Llaviana entamamos un proyeutu d’estes dimensiones”, asegura Marcelino Sánchez, presidente del Conseyu de la Mocedá de Llaviana y tamién del Conseyu de la Mocedá del Principáu d’Asturies. Baxo’l nome de “Aventures ensin fronteres”, esti coleutivu punxo en marcha la iniciativa en comuña con otra organización moza de Kelheim y l’asociación Cantiere Giovani de Napule/Napoli col oxetivu de que los mozos y moces participantes, con edaes comprendíes ente los 16 y 21 años, “puedan aprender a trabayar n’equipu, desarrollar les sos competencies personales o proyeutos sociales al traviés del deporte d’aventura”.
 
Asina, nestos díes, los asturianos pudieron escalar árboles, esplorar una cueva o nadar nel Donau (Danubiu) xunto colos participantes bávaros y napolitanos. Tres tornar a Asturies, esti domingu, tolos grupos van tener que desarrollar un proyeutu social con tolo qu’aprendieron estos díes nel land de Freistaat Bayern. Nel casu de los llavianeses, el Conseyu de la Mocedá va entrega-yos 300 euros y el material necesariu pa que puedan ellaboralu. L’añu qu’entra, otru grupu de mozos del conceyu va repetir la esperencia, anque nesta ocasión el puntu d’alcuentro pa desendolcar ‘Aventures ensin fronteres’ va ser Llaviana.