Diez bandes y artistes graben pa un discu canciones compuestes por escolinos nel concursu ‘Al son del cantar’

El vienres púnxose’l ramu al concursu escolar ‘Al son del cantar’ cola gala d’entrega de premios celebrada en Piedrasblancas. Alumnes y alumnos compusieron temes n’asturianu y gallego-asturiano pal certame y diez bandes y artistes grabaron les meyores pa dar como resultáu un discu que va servir de recursu pal profesoráu.

Pop Piquiñín, con ‘La madreña de mio güela’ (CRA Ḷḷena); Alfredo González, con ‘¿Quién será?’ (CP San Félix de Candás); Toli Morilla, con ‘Marineru’ (CP Ramón de Campoamor de Xixón); Bacotexo, con ‘El mañá das grandalesas’ (CPEB El Salvador de Grandas de Salime); Gente Terrible, con ‘Nun val la soledá’ (CP Salvador de Vega Berros de Sariegu) ; La Bonturné, con ‘Les fiestes del añu’ (CP Virxe del Fresnu de Grau); Calea, con ‘Cantu a les muyeres’ (IES Cangas del Narcea); Tringuilintainas, con ‘Xantar’ (CP Darío Freán Barreira de Cuaña); Llevólu’l Sumiciu, con ‘Protesta animal’ (CRA Cabu Peñes de Gozón); y Dani Stylo, con ‘¡Ye que me presta tanto!’ (IES Peñamayor de Nava), son los músicos que participaron nesta iniciativa de la Conseyería de Cultura, Política Llingüística y Turismu y la Rede de Normalización Llingüística. En total, collaboraron 15 SNL: Avilés, Candamu, Cangas del Narcea, Carreño, Castrillón, Corvera, Grau, Samartín del Rei Aurelio, Gozón, Ḷḷena, Xixón y les mancomunidaes de la ‘Comarca de la Sidra’, Cabu Peñes, Ozcos-Eo y Parque Histórico del Navia.

Los alumnos y alumnes premiaos tuvieron l’honor de participar na gala celebrada’l vienres nel Valey Centru Cultural de Castrillón, cola presencia de l’alcaldesa Yasmina Triguero y del direutor xeneral de Política Llingüística, Antón García, ente otres autoridaes. En total, dellos centenares de persones que s’axuntaron en Piedrasblancas pa esta fiesta tan prestosa al rodiu la música asturiana.

Distribución a los centros

El CD va distribuyise a los centros educativos públicos d'Asturies pa servir como recursu de trabayu pal profesoráu y el so conteníu yá ta disponible en llinia al traviés de les plataformes YouTube, Spotify, Apple Music, Deezer y Tidal. La gala, na que participaron gran parte de les bandes que lu grabaron, va emitise en TPA.

‘Al son del cantar’ taba destináu a escolines y escolinos de cuartu de Primaria a segundu de la ESO y buscaba estimular el deprendimientu significativu del alumnáu per aciu de la investigación, el descubrimientu y la creatividá nel campu de la música. El cantar ellaboráu nes llingües propies del país a partir d’una melodía tradicional y orixinal foi valoráu por un xuráu que fixo la escoyeta de los diez meyores pa la grabación del discu.

Na semeya, escolines y escolinos ganadores del concursu col discu na mano.