Diez años de la matanza de Srebrenica

Va güei diez años, Europa vivió la matanza de civiles más sangrina denfde la II Guerra Mundial. La ciudá de Srebrenica, onde seiscientos cascos azules holandeses teníen el mandáu de defender a la población civil de los ataque de los paramilitares, cayó en manes de la tropa serbia irregular que, actuando baxo les órden de de Ratko Mladic, nun alcontró resistencia nuna tropa bosnia desarmada y a la que los cascos azules nun devolvieron les armes que-yos confiscaren. N'entrando na ciudá, los paramilitares de Mladic entamaron una campaña de terror asesinando a más de 7.000 persones nuna selmana grabada na historia moderna d'Europa y que supunxo la mayor traxedia de la guerra en Yugoslavia.

La masacre de Srebenica foi dende'l primer momentu una vergoña pa la ONU, que reconoció públicamente nel 2000 el so error y tamién pal gobiernu holandés, que llegó a dimitir en pleno tres conocese nel añu 2002, siete años dempués de la matanza, un informe del Institutu holandés pa la Documentación Sobre la Guerra qu'esclarió munchos cabos sueltos que quedaben sobre la masacre. L'informe demostraba que que los soldaos holandeses, ataos de pies y manes pola curtia autoridá que-yos daba la ONU, nun pudieron facer un res por evitar l'ataque. Pero l'informe foi más allá, esplicando que los bosnios, enfotaos en que Srebenica yera "zona segura" provocaron a los serbios dende dientro la ciudá. L'informe tamién dicía que'l Ministeriu de Defensa Holandés-yos esmuciere información a los investigadores, y que los cascos azules llegaren a entregá-yos a la tropa paramilitar serbia 5.000 refuxaos musulmanes serbios que tenía al so cargu a cambiu de 14 cascos azules secuestraos.

Diez años dempués, los más de los acusaos pola matanza siguen en llibertá en llugar desconocíu, ente ellos Mladic y tamién Radovan Karadzick. Mientres, ta por aclariase'l destín de más de 14.000 desapaecíos durante la guerra en Bosnia.