Día poéticu nel Parlamentu asturianu

La XXVI Selmana de les lletres asturianes vivió ayeri ún de los sos actos más novedosos, como foi la llectura pública de poemes n'asturianu por parte de los diputaos de la Xunta Xeneral del Principáu d'Asturies. La presidenta de la Xunta Xeneral María Jesús Alvarez, entamó l'actu cola llectura d'unos versos de Miguel Rojo, y anque'l presidente Álvarez Areces nun participó nel actu, ellí tuvieron representantes del grupu socialista como Fernando Lastra, que recitó a Pablo Antón Marín Estrada o'l conseyeru d'Educación Iglesias Riopedre, que fizo otru tanto cola obra de Lourdes Álvarez "palabres", mientres que la titular de cultura Ana Rosa Migoya decantóse pol versu de Xuan Xosé Sánchez Vicente. Por parte d'Izquierda Xunida Bloque por Asturies xubieron al escañu d'oradores Javier Valledor y Noemí Martín, que participaron nel actu lleendo a Manuel Asur y a Fran Gayo respectivamente, mientres que'l líder de la oposición, Ovidio Sánchez, recitó versos de Xuan Bello. El Premiu Nóbel de lliteratura 1995 Seamus Heaney fexo de convidáu especial lleendo un de los sos poemes traducíu al asturianu.