Día grande pal deporte asturianu

El deporte asturianu vivió un gran día cola celebración ayeri de les prebes más competitives y emocionantes de la VII Olimpiada de Deportes Tradicionales que tolos años organiza la Tertulia Cultural "El Garrapiellu" en Pueblu d'Asturies de Xixón. La celebración conxunta el mesmu día y en mui pocu espaciu de la Olimpiada, la Feria de San Miguel, la Feria de Ganadería y Agricultura Agropec y yá pela tarde, el partíu del Sporting, cásique estragaron de tráficu tola eria del Piles. Les cifres de visitantes a la Olimpiada pasaron con bastante de les 50.000 persones a lo llargo de los dos díes d'eshibiciones y de competición, lo que diz muncho de la popularidá que tienen estes disciplines. Con too y con ello, l'apoyu institucional entovía nun llega a lo que debiere, al dicir de la organización, que se quexó deque lleven tres años ensin xubir l'ayuda oficial que reciben

En total disputáronse más de 40 modalidaes deportives, incluyendo 8 distintes de bolos, y tres competiciones oficiales , ente les que rescampla la de tiru de cuerda en pocera en categoría de 540 kg, onde l'equipu de Monte Areo ganó na final al de Perlora, quedando en tercer posición el de la Comarca de la Sidra. El campeonatu de llanzamientu de barra ganólu Juan Ramón Sierra, del equipu de la Comarca de la Sidra,
segundu foi Amador García del Monte Areo y terceru Toño Álvarez Bueno, del EDA Perlora.

El históricu de la llave Aurino Meana
proclamóse campeón de la especialidá, imponiéndose a Herminio Solares
y Leoncio Álvarez