Día d'Asturies nel Centru asturianu de Sao Paulo

El Centru Asturianu de de São Paulo organiza tamién la so Fiesta d'Asturies particular pa conmemorar el día de la tierra. Los actos, que van facese'l a lo llargo del mes de setiembre, van contar cola presencia del director de l'Axencia Asturiana d'Emigración, Luis Miguel Fernández Romero, que va aprovechar pa falar de la rellación del Principáu colos emigrantes y de les ayudes asistenciales a les que tienen derechu dientro del Plan d'Emigración del Principáu.

Los actos de celebración del Día d'Asturies en Sâo Paulo van entamar el 7 de setiembre, en Lagoas - Itapecerica da Serra, con una gran romería asturiana que va tener la tradicional procesión relixosa y misa de campu, con repartu a los asistentes de bollu preñáu y la botella vinu, amás d'un campeonatu de bolos.

El sábadu 24 de setiembre, el director de l'Axencia Asturiana d'Emigración, Luis Miguel Fernández Romero va visitar el centru y dar a conocer a lo sos socios les midíes que se conemplen nel Plan d'Emigración que tien acabante d'aprebar el Gobiernu asturianu, p'asistir darréu a la presentación de la "Coral Ibérica" na Sociedade Hispano Brasileira de São Paulo.

Los actos rematen el domingu 25 a les dos de la tarde, con una gran fabada asturiana que va prebase na Sociedade Hispano Brasileira de São Paulo. Los gaiteros Bras Rodrigo y Lorena Gómez, que van tar acompañaos polos gaiteros y cuerpu folklóricu de la Sociedade Hispano Brasileira de São Paulo, van echar el piesllu a estes xornaes.