‘¡Dí-ylo al mundu! Yo tamién sofito’

El Gobiernu entama una campaña d’apoyu a la candidatura de la cultura sidrera como patrimoniu inmaterial de la humanidá. La intención ye sumar a tola sociedá nesta iniciativa pa facer fuercia de cara a convencer a la UNESCO p’algamar el reconocimientu.

La conseyera de Desarrollu Rural y Recursos Naturales, María Jesús Álvarez González, presentó ayeri nel Muséu de la Sidra de Nava'l programa que va favorecer la participación ciudadana, tanto n'Asturies como nel esterior, y que va promocionase baxo’l lema ‘¡Dí-ylo al mundu! Yo tamién sofito’ tanto n’asturianu como en castellanu. “Los miembros de la gran familia asturiana que reside lloñe del Principáu y que tienen como buque insinia los centros asturianos foron los primeros n’implicase nesta emocionante iniciativa”, destacó.

Al so xuiciu, l'impulsu de la candidatura “ha ser un retu, una ilusión y un proyeutu de la sociedá nel so conxuntu, independientemente del llugar onde viva caúnu”. Por esti motivu, d'equí p'alantre, la propuesta “va transitar per dos siendes: la de l'Alministración autonómica y la de la sociedá asturiana”, según esplicó Álvarez.

El Gobiernu, col sofitu y la collaboración de científicos y espertos, lleva meses trabayando na ellaboración de la documentación qu’esixe la Organización de les Naciones Xuníes pa la Educación, la Ciencia y la Cultura (UNESCO, poles sos sigles n'inglés) pa formalizar una candidatura que lleva 8 años de retrasu. “Centrémonos en construyir el rellatu d'una tradición que ye seña identidá del ser asturianu; esi xestu inconfundible, esi ritual del escanciáu como parte intrínseca d'una socialización que convida a compartir, a celebrar y, a última hora, a estrechar llazos d'amistá”, indicó la conseyera.

Tamién manifestó que la sociedá ha ser la gran protagonista d'esta iniciativa, yá que la candidatura “zarra un mensaxe coleutivu y espresa la voluntá del pueblu, que quier que se conozan y reconozan los venceyos d'amistá universal y de fraternidá que zarra la bébora más emblemática d'Asturies”, col escanciáu “como seña d'identidá única, diferenciadora y irrepetible”.

Calendariu próximu

La participación de la ciudadanía va promovese al traviés d'una rede estensa d'embaxadores de la cultura sidrera, con un llabor que va consistir en sofitar y xestionar l'espardimientu de la propuesta en distintos ámbitos. Ente otres funciones, van asumir la xestión del llibru de firmes de sofitu en distintos puntos del territoriu y na web de la candidatura, con versión namái en castellanu.

Tamién van encargase de la coordinación con asociaciones o entidaes pa la recoyida de firmes, de la distribución de distintivos n'establecimientos hosteleros y comercios y de la divulgación de materiales informativos y promocionales. Ente los actos previstos pa recabar sofitos destaca una gran espicha que va tener llugar el 7 de febreru nel Llagar Trabanco de Sariegu, nel que van entregase les acreitaciones a los embaxadores, asina como’l material que van tener a la so disposición.

Amás, el día 29 va ponese en marcha la campaña de sofitu en tolos conceyos asturianos, que va desenvolvese hasta'l 15 de marzu. La candidatura tamién va tener proyeición na feria turística Fitur, que va celebrase en Madrid del 23 al 27 d'esti mes.

Na semeya, Otilia Requejo, direutora xeneral de Patrimoniu Cultural; Juan Cañal, alcalde de Nava; la conseyera Álvarez González; y María Jesús Aguilar, direutora xeneral de Desarrollu Rural y Agroalimentación.