Día del Llibru Asturianu

Desenvolvimientu Rural va doblar nel 2019 les ayudes a la incorporación de xente mozo al campu

|
Desenvolvimientu Rural va doblar nel 2019 les ayudes a la incorporación de xente mozo al campu

La conseyera, María Jesús Álvarez, anunció  n'Avilés la midida mientres la inauguración del Concursu de Ganáu de San Agustín.

Asina, esplicó que la medría d'ayudes va figurar na convocatoria de subvenciones a la modernización pal añu próximu, depués del cambéu del Programa de Desenvolvimientu Rexonal (PDR 2014-2020) del Principáu d'Asturies, aprobada apocayá pola Comisión Europea.

La Conseyería de Desenvolvimientu Rural y Recursos Naturales va incrementar nel 2019 la cuantía de les subvenciones a los proyectos de modernización de les esplotaciones ganaderes, al pasar la llende d'inversión susceptible de recibir ayudes de 100.000 a 200.000 euros por trabayador y de 200.000 a 400.000 euros por esplotación, lo que supón un aumentu del 100 % del tope de subvención. Estes llendes dóblense tamién si se trata d'una cooperativa, que va poder recibir el sofitu d'hasta 800.000 euros. El financiamientu públicu a estes inversiones llega al 40 %.

Amás, la conseyería va doblar nel 2019 l'importe de les ayudes individuales pa la incorporación de xente mozo al campu, incluyíes nel PDR, midida que va suponer xubir de 25.000 a 50.000 euros la subvención destinada a esti fin.

Esta ye la tercer modificación que se realiza del actual PDR d'Asturies. El cambéu propuestu por Desenvolvimientu Rural, y aprobáu por Bruxeles, reorienta'l gastu financieru de 57 millones del Fondu Européu Agrícola de Desenvolvimientu Rural (Feader) y afecta a un presupuestu públicu total de 81 millones.

Álvarez señaló que l'oxetivu ye reformar aquelles midíes que tienen mayor demanda del sector y qu'inciden en cuestiones fundamentales, como la incorporación de xente mozo a l'actividá agraria o les ayudes a la modernización.

Col cambéu pretende evitase tamién la perda de fondos que podría derivase del caltenimientu de la estructura actual. Pa ello, reaxústense les llinies con una execución más baxa “a favor de les que tienen mayor porcentaxe de xestión”, indicó Álvarez. Amás, añedió que la incorporación de xente mozo a l'actividá agraria y ganadera va disponer de 6 millones adicionales, “lo que supón más perres pa quien quieran dedicase a la ganadería y l'agricultura, pa tratar d'atayar de forma más efectiva l'avieyamientu del sector”.

La conseyera destacó, asina mesmo, la medría de los fondos p’ayudes a la inversión de proyectos vinculaos al programa Leader, que va ser de 32 millones.

Otra manera, sorrayó qu'Asturies “ye sinónimu d'actividá ganadera y produz básicamente lleche y carne”. Álvarez indicó que’l 87,5 % del total de la producción final agraria apórtalo la ganadería venceyada al bovín”. El valor de la producción final xubió nel 2016 a unos 562 millones, de los 335 correspondieron a la ganadería, añedió.

Anguaño, el Principáu cunta con más de 15.900 esplotaciones, que remanen unes 412.804 cabeces de ganáu sobre una superficie agraria útil de 579.287 hectárees, detalló Álvarez.

El titular de Desenvolvimientu Rural destacó “la crecedera ininterrumpida de la marca Xata Asturiana, con un valor comercial de 30 millones mentes que l'empléu mediu rellacionáu colos sectores inscritos supera les 10.000 persones”.

Refirióse tamién a que la comunidá autónoma “sigue liderando, per novenu mes consecutivu, el preciu de la lleche n'España y la producción, que s'afixera a la baxa, crez de nuevo”.

D’alcuerdu con Álvarez, la zona rural d'Asturies ye “esencial na recuperación económica, un territoriu nel que'l sector primariu sigue siendo clave”. Nesti sentíu, señaló que la Política Agrícola Común (PAC) “ye un instrumentu fundamental porque, ente otros aspectos, contribuye al caltenimientu de les rentes de los llabradores y ganaderos”.

Asina, insistió en que la próxima PAC “ha tar dotada d'abondos recursos económicos”. El Gobiernu d'Asturies defende un modelu agrariu “que sofite a la pequena esplotación familiar, a la ganadería que desenvuelve la so actividá en zones de monte y que siga siendo, común a tolos estaos miembros”, manifestó Álvarez.

La conseyera abogó porque la PAC próxima “supere los desequilibrios actuales ente territorios, acabando definitivamente col cobru actual por derechos históricos y xenerando nuevos venceyaos al llogru d'oxetivos d'interés públicu y, sobre manera, a l'actividá y l'empléu”.

L'Executivu asturianu tamién esixe una *PAC más xusta y redistributiva, na que s'estableza “un tope máximu d'ayuda por esplotación que nun supere los 60.000 euros”. Ente'l paquete de propuestes de Desenvolvimientu Rural figura'l destín de más recursos a les ayudes venceyaes a la producción, “incrementando la propuesta actual de la Comisión y dexando que se destinen a elles, pelo menos, el 15 % de los fondos”.

Contador Estadistiques