Desconvocaes les siete xornaes de fuelga nel seutor del automóvil

|

La propuesta presentada pola Asociación del Automóvil del Principáu d’Asturies (ASPA) convenció a los trabayadores. L’alcuerdu lleva a los sindicatos a desconvocar les siete xornaes de fuelga previstes n'abril en talleres y concesionarios.
 
Los  trabayadores mostráronse conformes cola ufierta que la patronal fixo llegar a los sindicactos al traviés del Serviciu Asturianu de Solución Estraxudicial de Conflictos (Sasec) consistente nun aumentu salarial del 1,25 por cientu pal 2010 y del 1,90 por cientu pal 2011. Cuando fine esti añu, namái a efeutu de base de cálculu pal incrementu salarial del 2012, ASPA propunxo actualizar les tables salariales de los años 2010 y 2011 col IPC real de cada periodu. No que respueta a los atrasos acumulaos hasta la fecha, les empreses del seutor comprometiéronse a abonar toles deudes colos trabayadores enantes del 30 de xunu.
 
Pa MCA-UXT y la Federación d'Industria de CC OO, esti alcuerdu demuestra que la escusa que dio la patronal pa bloquiar el conveniu, basada nel descensu de les ventes de coches por mor de la crisis, nun yera válida. Tres l’aprobación de la propuesta poles cinco asamblees de trabayadores –Xixón, Uviéu, Avilés, Cuadal y Nalón–, la comisión negociadora del conveniu va reunise nos díes próximos nel Sasec pa comunicar la decisión adoptada polos trabayadores.

Contador Estadistiques