Derrota nos caberos segundos

Esti sábadu'l Xixón Baloncestu perdió nos últimos segundos, igual que-y pasare l'anterior temporada, nel so partíu escontra'l Cantabria Lobos, qu'acabo con ún apretáu marcador de 74-75. L'equipu xixonés pudo ganar el partíu, pues tuvo l'última posesión con ocho segundos, pero un triple fallíu de Vallmajó y el rebote non tresformáu en canasta d'Iturbe, dexaron esi resultáu final.

El Xixón Baloncestu foi cuasi tol partíu tres del Cantabria nel marcador y una de les causes de la so derrota foron les perdes de balón, con un total de 21, frente a les 9 del contrariu. L´equipu local foi superior nos rebotes, con 43 frente a 30, y tamién en tiros triples.

El Cantabria Llobos tuvo una máxima diferencia de 11 puntos que llogró nel primer cuartu (12-23). Dempués el Xixón llogró reducir esa diferencia nel segundu cuartu y ponese a un puntu (28-29). Anque'l Cantabria pegó un nuevu estirón y punxo nel lletrónicu un 28-36 cuando faltaben 2´36", pero dos triples siguíos de Vallmajó punxeron l´empate a 36 y el Xixón finó'l cuartu y foi al descansu con una ventaya de dos puntos (40-38).

Na segunda parte la irregularidá local fizo que siempres fueren a remolque del equipu foriatu. Asina`l Lobos llogró una diferencia de seis puntos al final de tercer cuartu (53-59).

Nel entamu del caberu cuartu, dos canastes de Tim Young y Lledó punxeron el marcador nun apretáu 57-59 y dempués nun empate a 64, cuando faltaben 6´36", pero dende esi momentu foron too ventayes pal Cantabria, xeneralmente d'unos cuatro puntos, hasta que, faltando 30´, Pacreu llogró una canasta con tiru adicional por personal y llogró l´empate a 74. Nate Ermann rompió esi empate pa establecer el definitivu 74-75, dempués d´una personal d'Antxon Iturbe, al tresformar los dos tiros llibres. Nel siguiente ataque`l Xixón tuvo siete segundos que nun supo xugar.

Nel Xixón Baloncestu hai de destacar a Tim Young (16 puntos y 1 rebotes) y a Xavi Vallmajó (20 puntos). Nel Cantabria Lobos destacaron Diego LoGrippo (20 puntos, 14 nel segundu tiempu), Jacobo Odriozola (24 puntos, con siete triples de nueve intentos) y Nate Erdmann (15 puntos).