Derrota del nacionalismu quebequés

El nacionalismu quebequés, que llevaba espoxigando ensin interrupción en toles elecciones dende va más de venti años, llevó un palu de los gordos nes elecciones anticipaes que se celebraron ayeri na provincia francófona del Canadá. Según los primeros datos, la mayoría de los 7,4 millones d'habitantes del Quebec votaron pal centru-derechista Partíu Lliberal del Québec de Jean Charest, que defende un Canadá federal. Ello supón que'l centru-izquierda independentista del Partíu Quebequés dexa'l poder tres de nueve años al quedar col 33,7% de los sufraxos. Tercera quedó la nueva formación derechista Acción Democrática de Québec (ADQ), de Mario Dumont.

El PLQ llevaba nueve años siendo la principal oposición al independentista PQ de Bernard Landry, pero esta foi la primer campaña en que pesaron más los argumentos sobre polítiques sociales de sanidá y educación que'l debate soberanista. Los nacionalistes nun teníen la reelección afitada, polo que decidieron adelantar la fecha de les elecciones, pero la campaña electoral acabó de fundir les opciones nacionalistes, que foron menguando nes socesives encuestes hasta'l día d'ayeri.