Derrota de los partíos tradicionales nes Presidenciales franceses

El centrista lliberal Emmanuel Macron (23,75 por cientu) y la ultraderechista Marine Le Pen (21,53 por cientu) dexen a socialistes y republicanos fuera de la segunda vuelta.

El 7 de mayu los ciudadanos franceses van escoyer ente Macron y Le Pen al futuru presidente de Francia. Ésti nun saldrá de nengún de los dos partíos tradicionales, yá que tanto'l Parti Socialiste Français, formación del actual xefe d'Estáu Françoise Hollande, como Les Républicains viéronse superaos por En Marche!, partíu de creación recién fundáu pol que fuera ministru d'Economía d'Hollande ente 2014 y 2016, cuando dimitió pa centrase nel movimientu políticu que lidera de cara a estes Presidenciales, y pol ultraderechista Front National.

Destacada foi la cayida de los socialistes lideraos por Benoît Hamon, que na primer vuelta del 2012 foron los más votaos con un 28,63 por cientu del total y qu'ayeri baxaron hasta'l 6,35 por cientu, pasando a ser la quinta fuercia. Mentes, el republicanu Françoise Fillon quedó en tercer llugar, con un 19,94 por cientu, lloñe del 27,18 por cientu de Nicolas Sarkozy hai cinco años. Dambos yá confirmaron el so apoyu a Macron de cara a la segunda vuelta de les Presidenciales franceses.

Otra de les nueves cares, Jean-Luc Mélenchon (La France Insoumise) tuvo que conformase con un 19,62 por cientu, mentes que Philippe Poutou (Nouveau Parti Anticapitaliste) quedó nun 1,10 por cientu.

Ratificación de la Carta Europea

Macron ye ún de los trés candidatos que respondieron a los coleutivos de defensa de los idiomes propies del Estáu francés perteneciente a European Language Equality Network (ELEN), de la que forma parte Iniciativa pol Asturianu, tres l'unvíu d'una carta na que reclamaben los sos derechos llingüísticos. El compromisu del líder d'En Marche! ye la de ratificar la Carta Europea de les Llingües Rexonales o Minoritaries.