Denuncien un reblagu na mortalidá d'araos

La otra selmana destacábemos n'Asturies.com que la mortalidá d'araos nes costes asturianes taba rexistrando un nuevu picu un añu llargu dempués de la marea prieto del Prestige. Miembros de la Coordinadora Ornitolóxica d'Asturies lleven dende va quince díes pacá pañando páxaros muertos que lleven restos de galipote apegaos, una denuncia qu'agora recueye tamién el Centru d'estudiu y Protección de les Especies Marines (CEPESMA)

Los responsables de CEPESMA dicen que del 21 de febreru p'acá lleven recoyíos más de 390 páxaros muertos, los más d'ellos araos comunes, una especie migratoria que pasa'l veranu pa la parte de les islles britániques y nel bálticu y que pasa pela nuestra costa ente ochobre y abril.

Los vezos alimenticios del arao, que se somerguya na mar pa pescar l'alimentu, espuxéronlu l'añu pasáu a un mayor dañu por razón del galipote, y parez qu'esti añu, colos restos de la marea prieto flotando nel Cantábricu, la mortalidá natural d'esti páxaru ta sofriendo otru reblagu. Dende'l CEPESMA apunten que les cifres de mmuertes d'estos díes perpasen con muncho a cualquier otru episodiu anterior, lo que llevó a la propia Dirección de Recursos Naturales a crear un dispositivu especial, como yá adelantáremos la otra selmana.

CEPESMA diz que los exemplares que se recoyeron con vida hasta agora foron namás el 3% y con un grave estáu de deshidratación y desnutrición, presentando defecaciones con arrastre de mucosa y en dellos casos espulsiones de galipote y hipotermia grave. Ente les causes de les muertes masives, el centru l.luarquín apunta la falta d'alimentación, les baxes temperatures d'estos díes, l'efectu de dellesartes de pesca ente les qu'apunten les redes y el palangre y, a la fin, la inxestión de galipote.


Los biólogos del Cepesma creen que tolos casos se rellacionen ente ellos sacantes los problemes climáticos en cuantes que la falta d'alimentu obliga-yos a pescar directamente nes redes de los barcos, onde munches vegaes queden prendíos hasta afogase. Los biólogos camienten que la falta de plancton pola contaminación del galipote tamién produz la desapaición d'especies característiques de la dieta d'estos páxaros. Los técnicos sorrayen que ven con tristura como báramos enteros d'araos yá mui dañaos s'alleguen playes o puertos ensin dexase atrapar y apaecen muertos al día dempués, casu de los14 exemplares que s'atroparon n'Artéu.