Denuncien tortures contra 19 sah.arianos encarcelaos en Salé

El Colectivu de Defensores de Derechos Humanos Sah.arianos (Codesa) denunció que 19 presos sah.arianos pendientes de xuiciu militar na prisión marroquina de Salé, sufrieron tortures y violaciones de Derechos Humanos.

Nun comunicáu, Codesa aseguró que los abogaos de los presos sah.arianos denunciaron "descargues eléctriques, violaciones con palos, simulaciones d'afogamientos, palices, insultos y falta d'atención médica, un rosariu de barbaridaes propiu d'un campu de concentración nazi".
  
Los 19 presos sah.arianos tán pendientes de xuiciu militar pola so presunta relación col campamentu de protesta sah.arianu de Gdeim Izik, próximu a El Aaiún y esmanteláu poles fuerces de seguridá marroquines el pasáu 8 de payares. Toos ellos permanecen encarcelaos a la espera de que s'anuncie una fecha pa la vista, una vez acabe la fase d'instrucción, ante'l maxistráu del Tribunal Militar de Rabat, según los abogaos.
  
Les tortures y los abusos, aseguró Codesa, cometiólos la Policía marroquina, "tanto mientres la so detención como mientres la so reclusión, baxo responsabilidá yá de la Dirección Xeneral d'Instituciones Penitenciaries".
 
Coles mesmes, Codesa dixo qu'a la mayoría de los prisioneros detuviéronlos "paramilitares armaos y mazcaraos" y darréu obligaos "a roblar o poner la so güelga nos informes de la Policía Xudicial colos güeyos vendados sin poder lleer, ver o escuchar lo que dicíen".
  
Dempués de comparecer "descalzos y gravemente firíos ante la Fiscalía Xeneral del Tribunal d'Apelación d'El Aaiún o ante'l xuez del Tribunal Militar de Rabat", treslladáronlos a la cárcel, prosiguió. Nel penal de Salé, aseguraron los sos abogaos, privóselos tanto de l'atención médica como de "los derechos de los presos sobre la pertenencia d'efectos personales, los rexistros, l'aislamientu o les visites".