Denuncien qu’el Gobiernu asturianu nun controló los alimentos tresxénicos nel 2004

La Coordinadora Asturiana Contra la Manipulación Xenético de los Alimentos, organización na que tan presentes los sindicatos agrícoles UCA y COAG, la Coordinadora Asturiana d'Agricultura Ecolóxico (CADAE) y instituciones como'l Conseyu Regulador de la Producción Agrario Ecolóxico d'Asturies (COPAE) o la Unión de Consumidores (UCE) xunta colectivos conservacionistes y comercializadores de productos ecolóxicos como la cooperativa La Osa, Cambalache o L'Arcu la Vieya denunció ayeri que nel añu 2004 nun se fizo campaña d'inspección n'Asturies que garantizare'l poder estremar ente alimentos tresxénicos y convencionales

La Coordinadora Asturiana Contra la Manipulación Xenético de los Alimentos empobinárase yá'l mes de xunu del 2004 a l'Axencia de Sanidá Ambiental y Consumu del Gobiernu asturianu. Esi mes cumpliérense los dos meses de la entrada en vigor del reglamentu qu'apautaba les normes d'etiquetao de los productos que llevaren na so composición organismos alteriaos xenéticamente, y la organización estimó conveniente interesase poles midíes y programes de control que Consumu tuviere en marcha pa comprobar l'etiquetao d'alimentos con Organismos Manipulaos, asina como interesase por posibles espedientes abiertos a empreses que nun cumplieren cola llei y saber el catálogu d'alimentos con OMX's presentes nel mercáu asturianu. La rempuesta de l'Axencia de Consumu foi que diba facese una campaña específica sobre'l tema nel añu 2005, reconociendo implícitamente con ello que nel 2004, con tar yá funcionando la llei sobre etiquetao d'estos productos, nun se ficiere res por controlar la so presencia en mercáu.

La necesidá d'etiquetar los alimentos tresxénicos ye grande según diz la Coordinadora en cuantes que ye la única manera d'alertar al consumidor sobre la esistencia d'organismos tresxénicos que, según los grupos qu'igüen la Coordinadora, suponen riesgos reales pa la salú como reacciones d'alerxa y desequilibrios nutritivos, ello amás d'otros riesgos posibles como'l saltu de xenes resistentes a antibióticos a les bacteries del intestín.
Más información sobre l'impactu de los tresxénicos na web de Greenpeace