Denuncien l'urbanismu de Cuideiru

La Coordinadora Ecoloxista d'Asturies ta acabante d'unviá-y una carta a la Conseyería de Mediu Ambiente, Ordenación del Territoriu y Infraestructures pidiendo que se caltenga l'actual catalogación como non urbanizable de los terrenos de Valdréu (Cuideiru) apegaos a un area industrial del llugar y que tan agora en procesu de recalificación. Miembros de la Coordinadora participaron esta mañana nuna concentración n'Uviéu en protesta pola situación urbanística d'esti conceyu

Según la Coordinadora, l'intentu de recalificación d'esti suelu, qu' entra dafechu nel Paisaxe Protexíu de la Costa Occidental, enxértase nun intentu del Conceyu de Cuideiru de gana-yos terrén a les zones de suelu protexíu, una estratexa que los conservacionistes denuncien que yá entamó cola creación de los polígonos d'Ouviñana y Valdréu que la Comisión d'Urbanismu y Ordenación del Territoriu d'Asturies (CUOTA) yá condenare'l 16 de febreru de 2001 nuna decisión que'l Conceyu de Cuideiru nun respetó, afalando la instalación de naves industriales en polígonu. La recalificación que se pretende facer agora, siempre según los argumentos de la Coordinadora, ye grave por demás, en cuantes qu'agora trátase d'arrampuñar con un total de 28 hectárees enxertes nel Paisaxe Protexíu de la Costa Occidental, figura que depende del Plan d'Ordenación de los Recursos Naturales (PORNA) instrumentu d'ordenación territorial que manda penriba del planeamientu urbanísticu a nivel llegal. Esta declaración obliga a que nun se faigan nel espaciu protexíu más actividaes que les agrícoles o aquelles que seyan "de carácter llimpiu. Xunta ello, los ecoloxistes demanden la retirada de la nave industrial de la empresa Armanorte, qu'ocupa una hectárea de suelu.

El grupu ecoloxista demánda-y a la Conseyería de Mediu Ambiente que-y reclame les responsabilidaes "polítiques o penales" que tuviere nel asuntu l'alcalde de Cuideiru, que, al paecer d'esti grupu "protagonizó ún de los episodios más llamentables que se recuerden na xestión urbanística dende que se creo l'autonomía asturiana nel 1981". El colectivu echa tamién contra'l gobiernu asturianu, al qu'acusa de "primar el corporativismu políticu en cuenta del interés públicu que demanda la defensa mediuambiental y de la llegalidá"