Denuncien los daños sobre’l mediu marinu de los sondeos p’alcontrar petróleu

La organización Ecoloxistes n'Acción denunció l'autorización, por parte de l'alministración central del Estáu de proyectos d'investigación y estracción d'hidrocarburos que van según los ecoloxistes contra la normativa estatal y comunitaria y contra'l Derechu del Mar. Pa encontrar esta denuncia la organización tien fechu un estudiu nel que s'analicen los efectos d'estos sondeos sobre'l Mar d'Alborán, les islles Canaries y la costa d'Asturies, onde la empresa Repsol YPF tien concedida d'ochobre del añu 2003 llicencia por 6 años pa entamar cinco árees d'investigación.

En concreto los ecoloxistes denuncien l'emplegu nes prebes de cañones d'aire comprimió o "Air-guns" capaces de facer ondes sonores qu'ayuden a definir la estructura del suelu y subsuelu del mar pero que polos sos altísimos niveles d'intensidá, ente los 180 y 250 decibelios, son "intolerables" pa la fauna marina y puen llevar a varamientos de cetáceos al desnortiar los sos sistemes de navegación.

Los ecoloxistes denuncien que los cañones d'aire puen dañar tamién los recursos pesqueros de les zones afectaes poles prospecciones, teniéndose pa esta afirmación nos resultaos d'otres campañes que se fexeron pol mesmu sistema nel Mar del Norte, y nos que s'alcontraron daños na vexiga natatoria, güeyos y sistemes auditivos n'especies como'l bocarte, que yá tan nel momentu actual pasando per una grave crisis.

Nuna segunda fase de los sondeos, na qu'entamaríen a afuracase los pozos, la organización conservacionista denuncia tamién nel so informe que la mezclienda a de minerales y productos químicos que s'empleguen nestos llabores suel echase al mar, criando too ello una basa altamente contaminante capaz de dañar la fauna y los escalones más baxos de la pirámide alimentaria del mar en venti kilómetros cuadraos.