Selmana de les Lletres Asturianes

Denuncien l'embalse de Caliao énte la UE

Con motivu de la celebración güei del Día Mundial del Agua, la Plataforma pola Defensa del parque de Redes, na que tan representaes cerca de venti asociaciones ecoloxistes, sociales y polítiques, fizo pública la denuncia que va presentar énte instancies comunitaries pa que dende la UE se torgue la construcción del Embalse de Caliao (Casu) la obra hidráulica más polémica d'Asturies.

El manifiestu conxuntu de la plataforma diz que "Impidir la construcción del banzáu de Caliao nun supón namás salvar un valle dientro d'un espaciu natural protexíu" y apunta que, amás d'esti oxetivu, lo que se proponen ye "saber que vamos dar un gran pasu nel nuestru esfuerzu por consiguir un desarrollu sostenible nel que toos síamos conscientes de lo llimitao de los nuestros recursos".

La denuncia de la plataforma tien como principal argumentu l'incumplimientu de delles lleis del derechu comunitariu y nel gran impactu ambiental de la obra, que va suponer la construcción d'un banzáu con capacidá pa 33'4 hectómetros cúbicos d'agua nel altu Nalón, ello dientro d'un parque declaráu Reserva de la Biosfera pola Unesco y Llugar d'Interés Comunitariu pola UE. Les directives europees que s'incumpliríen en Caliao según la denuncia sedríen les de xestión del agua, caltenimientu de los hábitat, la de conservación de les aves y la que regula les evaluaciones d'impactu ambiental

La plataforma afirma que la obra en Caliao respuende a "criterios de planificación hidrolóxica yá desfasaos" y que van en sentíu contrariu dafechu a lo que manda la política de xestión de los recursos hídricos que se conseña na Directiva 2000/60/CE, qu'apauta oxetivos y midíes que van "en llinia contraria a la política hidraulicista de xuba continua de la ufierta, que ye lo que pretende'l proyectu de Caliao" al dicir de la Plataforma, que denuncia al mesmu tiempu que nun s'estudiaren otres alternatives de menor impactu que permitiríen llograr los mesmos oxetivos con menor coste económicu y ambiental. Estes alternatives pasaríen per entamar sistemes modernos de xestión de la demanda d'agua, facer campañes d'aforru empobinaes a la opinión pública, la reparación de les infraestructures yá existentes -la denuncia asegura que la rede de tuberíes pierde un 20% del agua que pasa per ella-, l'estudiu de los manantiales y acuíferos espardíos pel país como alternatives en cuenta d'aprovechar un únicu ríu como fonte pa toa Asturies, y una mayor atención a los banzaos yá existentes, que tan poco cuidaos, al dicir de la plataforma. La plataforma asegura que Caliao, en cuenta d'ameyorar el suministru d'agua n'Asturies, diba encarecer el preciu d'esti recursu, colo que, paradóxicamente, podría dase una baxada del consumu, y propón que s'apaute un preciu estacional del agua pa sensibilizar a la población y axustar ufierta y demanda.

Contador Estadistiques