Denuncien l'efectu del tren de bolos nel Cantábricu

Mientres les reserves de pescáu mengüen y tolos organismos internacionales alerten sobre'l peligru que cuerre la mayor reserva d'alimentos mundial, el Ministeriu de Pesca estudia si prohibe o non les artes d'arrastre que se conocen como "tren de bolos", a les que munchos sectores interesaos na cuestión acusen d'esfarraplar el fondu de la mar, mientres parte la industria pesquera defende la so vixencia.

La otra selmana, la ministra de pesca Elena Espinosa daba anuncia na so visita a Asturies de que, anque'l so departamentu tien encargáu un estudiu sobre los efectos del tren de bolos, la posible retirada del apareyu depende de la Unión Europea, una rempuesta cola que sigue nel aire la salida, seya nun sentíu o otru, a una polémica que, nel so día, llevó a un gran sector de los pescadores asturianos a facer un paru masivu

Énte esta situación, l'asociación "oceana" que dirixe Xabier Pastor (antiguu presidente de Greenpeace España) recuerda que yá esisten otros estudios fechos en Noruega, Mar de Bering y Alaska que demuestren los efectos del "tren de bolos" y que sedríen prebes científiques abondes pa prohibir l'arte

El tren de bolos, una rede acompañada d'un arrastre de fondu compuestu por pesos y rodiellos de goma (como pue vese na semeya) ye capaz d'arrancar mases d'hasta 18 tonelaes, causando un estrozu difícil de recuperar nos fondos oceánicos. Nesti sentíu, Oceana diz que yá esisten estudios, dellos cola firma de Conseyu Internacional pa la Esploración del Mar (ICES) que demuestren qu'ecosistemes tan sensibles como los bancos de coral puen desapaecer dafechu pol efectu del tren de bolos.

La investigación científico más de recién ta descubriendo la importancia d'estos ecosistemes nel caltenimientu de la cadena trófica nel conxuntu del mar y ye qu'un sistema coralinu pue abellugar hasta 800 especies distintes de pexes y criatures marines, pero ye qu'amás dellos d'estos sistemes de coral tan nel cantábricu, llegando los más antiguos a los 8.000 años d'evolución que puen desapaecer en minutos col pasu del tren de bolos, cosa que la organización ecoloxista denuncia que yá tien pasao. Según los estudios esistentes, especies como la merluza o'l pixín dependen pa la so reproducción de la bona salú d'estos bancos de coral y les especies que viven nellos.

Amás de solidarizase colos pescadores contrarios al tren de bolos, la organización de Xabier Pastor presentó-y va poco una entruga al diputáu asturianu del PP, Luis Peláez, quien pidió al Principáu que se ficieren públicos los estudios del barcu d'investigación del Ministeriu "Vizconde de Eza" nos caladeros asturianos d'El Cachuchu. Oceana pidía-y a Peláez que, en muestra d'esi interés pol efectu del tren de bolos, unviare una petición a la eurodiputada y anterior Secretaria Xeneral de Pesca Marítima, Carmen Fraga, pa que'l Parlamentu Européu prohibiere'l tren de bolos.