Denuncien l'ataque a la playa La Güelga

La Coordinadora Ecoloxista d'Asturies presentó alegaciones al Plan Especial de la playa La Güelga que ta tramitando'l Conceyu de Llanes

La playa La Güelga ye un sablón pequeñu del conceyu de Llanes. Con 500 metros cuadraos cola marea alta y 1.000 en marea baxa, La Huelga asítiase nun llugar d'altu valor paisaxísticu y ambiental, entovía ensin urbanizar y con accesu per caleyes ensin esfaltar. Un llugar virxe nel que'l Conceyu de llanes quier entamar un plan Especial qu'incluye ente otres actuaciones la creación de dos entraes esfaltaes, una d'elles saliendo dende H.ontoria y con aparcaderu a 100 metros de la entrada de la playa, cuando la llei manda que seyan 250 metros mínimo, la creación de dos árees recreatives, la construcción d'un chigre d'ente 90 y 150 m2 que s'amestaría al chigre que yá esiste, cuando la llei echa los chigres p'atrás de los 500 metros de la playa, y un corredor de madera arrodiando tol perímetru de la playa.

El grupu conservacionista ve en too ello un conxuntu de midíes agresives y descomanaes al tenor de les dimensiones de la playa, que camienten que va convertise nun "parque d'atracciones" que namás se tien nun presupuestu d'esplotación turística. Nel documentu d'alegaciones, que sorraya la falta d'Estudiu d'Impactu Ambiental acompañando l'espediente del proyectu, los ecoloxistes denuncien l'incumplimientu de la normativa autonómica d'ordenación del territoriu, lo agresivo de la obra que se cuenta facer nun entornu d'altu valor ambiental y les contradicciones qu'alcuentren nel espediente de la obra, nel que se llega a dicir que l'entornu de la playa La Güelga tien un altu valor ecolóxicu y una alta riqueza y biodiversidá en cuantes se refier a vexetación". Arriendes d'ello, la playa La Güelga entra dafechu nel Paisaxe Protexíu de la Costa Oriental, entra nel Llugar d'Interés Comunitariu "Ribeseya-Tinamayor" que se-y propunxo crear a la UE dende'l Gobiernu asturianu.