Denuncien la posible contaminación de La Cueva del Pindal

La Coordinadora Ecoloxista d'Asturies señala a una ganadería asitiada "nel entornu de proteición" del güecu natural qu'acueye importantes pintures rupestres.

Esti coleutivu esplica que parte del cuchu de los animales d'esta esplotación entemezse col agua d'una charca asitiada na finca onde tán los cebadorios. "Esti arramáu y les agües d'un regueru cercanu filtren al subsuelu d'esta zona kárstica, polo que pueden tar contaminando con materia orgánica la cueva con arte rupestre", esplica.

"Nun podemos permitir que la contaminación dañe esti importante patrimoniu prehistóricu énte la desidia de les alministraciones, qu'han facer cumplir la proteición del entornu de La Cueva del Pindal, con declaración recoyida nel BOPA del 9 de xunetu del 2009", apunten los ecoloxistes, que punxeron la situación en conocimientu de la Conseyería de Cultura, Política Llingüística y Turismu, y de la de Medio Rural y Cohesión Territorial, de la Confederación Hidrográfica y del Concyu de Ribedeva, reclamando una respuesta sobre l'impautu de la esplotación ganadera.

"Esiximos el so pieslle y lla limpieza completa de la zona afeutada, ensin tardanza, pa torgar la infiltración de les agües residuales de l'actividá ganadera a esta importante cueva con arte rupestre y pa facilitar la rexeneración d'un espacio natural que ye parte del Paisaxe Protexíu de la Costa Oriental", apunta la Coordinadora Ecoloxista. La Cueva del Pindal ye Patrimoniu Mundial de la Humanidá dende'l 2008 al acoyer nel so interior destacaes pintures que representen na so mayor parte fauna prehistórica, como mamuts, caballos o venaos.