"Dende VOX paralizóse conscientemente’l funcionamientu de la organización municipal", asegura Moriyón

L'alcaldesa de Xixón espulsa a la ultraderecha del equipu de gobiernu municipal.

"El motivu d’esta comparecencia ye anunciar a la ciudá de Xixón, a los xixoneses y a les xixoneses, que, como alcaldesa, toi acabante firmar les resoluciones poles que VOX queda fuera del gobiernu llocal", arrancó Carmen Moriyón la convocatoria énte la prensa qu'anunció güei depués d'espublizar na rede social X el mensaxe "acabóse". Foi depués d'una rueda de prensa celebrada esta mañana pola hasta agora edil de Festexos, Sara Concepción Álvarez Rouco, sobre los cambios que pretendía intrdoducir nel Festival Internacional de Cine de Gijón/Xixón (FICX).

"Ye una decisión mui meditada y que nun respuende únicamente a les declaraciones que tuvieron llugar esta mañana en rellación al Festival Internacional de Cine de Gijón, declaraciones que per otru llau considero que nun tán al altor d’una ciudá como Xixón y qu’atenten contra la tolerancia que siempre carauterizó y va siguir carauterizando la nuesa ciudá", especificó darréu la presidenta de Foro Asturias, qu'apuntó que "la realidá ye que, llueu d’estos meses, constatamos que VOX non sólo nun foi quien a exercer les responsabilidaes de gobiernu que nos otorgaron los xixoneses, sinón qu’antepunxeron les sos sigles al interés xeneral de la ciudá. Y mientres sía alcaldesa nun lo voi permitir".

Previamente Moriyón dixera que "Foro Asturias ye un partíu que cree fondamente na democracia. Por esi motivu entendimos que yeren les urnes les qu’avalaben la entrada de VOX nel equipu de gobiernu, una entrada qu’implicaba una oportunidá pa trabayar por y pa Xixón".

"Amás de les declaraciones respeuto al Festival de Cine, quiero que se sepa que dende VOX paralizóse conscientemente’l funcionamientu de la organización municipal y foron pasivos dafechu respeuto al primer gran proyeutu conxuntu de cualquier gobiernu, esto ye, les ordenances fiscales. Quiero ser mui firme nesto: Foro Asturias nun incumplió pautu nengún, tolo contrario", siguó l'alcaldesa.

Por último, Moriyón señaló que "el primer comprimisu adquiríu por esti partíu que tengo l’honor de presidir ye cola ciudadanía d’Asturies y nesti casu concretu, cola de Xixón. Por eso, reitero, mientres yo sía alcaldesa esta ciudá nun va permitir nenguna inxerencia dende Madrid o dende ónde sía", y garantizó que "Xixón nun esperimentará retrocesu nengún nes sos llibertaes. Esta ciudá ye una ciudá llibre, tolerante y acoyedora. Siempre lo foi y va siguir siéndolo".

VOX va dar la so versión güei

La comparecencia de la primer edil, que s'allargó per poco más de 3 minutos, nun almitió entrugues. VOX convocó una rueda de prensa pa les 20.30 hores d'esta mesma tarde y el PSOE tamién va opinar sobre'l tema media hora enantes.

Na semeya, Moriyón acompañada de conceyales de Foro.