Del corte de corriente en Wall Street al másimu del Ibex

Nuna selmana marcada pol corte de corriente qu'afectó a los Estaos Xuníos y Canadá y que resucitó l'alcordanza del once de setiembre, les principales bolses pesllaron la selmana pasada con xubes.



Los datos macroeconómicos de la selmana pasada confirmen la recesión d'Alemaña, motor européu. Xunta Alemaña, los países de la Xunión Europea tan estancaos y les sos economíes nun medren. El riesgu de crisis económica nun ta lloñe pa los europeos anque hai qu´esperar a dempués del branu p´analizar les perspectives del últimu cuatrimestre del añu.

El pánicu tornó a la Gran Mazana pol inmensu apagón que diz muncho de les males y vieyes infraestructures elléctriques de la primer potencia del Mundu. El casu ye que dende que se privatizó la corriente nos EEXX, nun hubo meyora denguna na rede elléctrica. El corte de corriente nun aparó l´actividá de los brokers de Wall Street pero sí fizo que´l volume de negociu baxare a esgaya, anque gracies a los xeneradores y sistemes d´emerxencia la Bolsa de NY furruló ensin problemes. L´índiz Dow Jones medró un 1,42% y el tecnolóxicu Nasdaq un 3,53%.



Perbona selmana nel Vieyu Continente, onde los índices señeros de Londres, París y Madrid algamaron másimos anuales. A la contra, a la bolsa alemana nun-y presto res la confirmación de la recesión nel país. Tamién influyó l´anuncia de los peores resultaos de l´aseguradora Allianz, mentantu que la dañada Deutsche Telekom algamó beneficiu por primer vez en tiempu.

La Bolsa de Madrid continuó con un baxu nivel de negociu, alrodiu los 1.300 millones d´euros, pesllando l´Ibex-25 la curtia selmana (xueves y vienres nun se trabayó) nos 7.110,30 puntos, un másimu anual dempués d'una xuba del 1,60%. Esto supón francer la barrera de los 7.080 puntos, ello gracies a les bones anuncies de Wall Street y pola fuercia de les xubes del Grupu Telefónica, nel que la empresa matriz mangose en másimos anuales al tocar la cotización los 10,69 euros. BBVA y SCH tamién subieron penriba´l 1,80% hasta algamar los 9,88 y los 7,92 euros respectivamente. La petrolera Repsol tuvo una perbona selmana trancando en másimos pola perspectiva que tien de metese al negociu del petroleu iraquino. Tamién influyó la xuba de precios aprebada pol Gobiernu Arxentinu que beneficia a esgaya a la petrolera. Otros valores que pesllaron en positivo foron Abertis, Gamesa, Gas Natural y Endesa. A la contra les empreses tecnolóxiques y recoyíes nel índiz Nuevu Mercáu tuvieron abultaes perdes. La Bolsa de Madrid medró nel conxuntu de la selmana cerca´l 2%.



L´euru continúa en caída llibre y a lo llargo de la selmana pasada cotizó sobre los 1,12 dólares. La moneda europea ta nuna difícil situación énte lo feble de la economía europea y la supuesta medra de l'americana. El petróleu sigue xubiendo nun momentu de gran crecimientu del consumu enerxéticu pola fola de calor. Agora, l'oru prieto sigue penriba los 30 dólares el barril, preciu altu pero estabilizáu dientro de lo que cabe. Anécdota trescendente foi'l sabotaxe d´un oleoductu al norte d´Iraq, que fai más difícil les esportaciones del país ocupáu. El baxu volume de negociu y el posibilismu de dellos inversores ficieron posible una perbona selmana nes bolses, que sólo quixeron sentir les anuncies positives. Pero esta bona tendencia tien que confirmase a la vuelta de les vacaciones. Setiembre va ser clave pa saber si la tendencia positiva d´esti añu va caltenese, lo menos, hasta´l 2004.