Del 11-s al 11 de marzu

Dempués de la celebración de los seyes meses de los atentaos del 11-s, y cola guerra n'Afganistán dando les boquiaes, los EEXX apunten el so siguiente enemigu a baltiar, que nun ye otru que l'Irak de Saddam Hussein. El dictador iraquí, mangáu en poder por aciu de los EEXX cuando la guerra contra l'Irán del ayatollah Khomeini, convirtiose tres la caída del comunismu nel este d'Europa na bestia negra de la política esterior americana de los 90. Agora, la campaña bélica "llibertá duradera" mira pa Irak como la siguiente cabeza de la hidra terrorista a esborriar del mapa. L'enfotu bélicu americanu espéyase tamién na información qu'anda saliendo sobre la recuperación del armamentu nuclear pa usalu na guerra antiterrorista, una anuncia que de momentu nun pue calificase más que de globu sonda pero que mete bastante mieu Tolos periódicos europeos recueyen con preocupación les declaraciones de Bush nesta tema, anque'l más radical ye l'Independent inglés, que nun dulda en titular que "La guerra contra Saddam ye inevitable" pela so parte, El País fala de la rempuesta europea al plan americanu, y sentencia que Blair prepara a los ingleses pa un ataque a Irak.