Declaráu Bien d'Interés Cultural el Palaciu de San Román de Panes

El Conseyu de Gobiernu autorizó ayeri'l proyectu de Decretu pol que se declara como Bien d'Interés Cultural (BIC), cola categoría de Monumentu, el palaciu de San Román de Panes, nel conceyu de Peñamellera Baxa. La portavoz del Executivu Autonómicu, Ana Rosa Migoya, esplicó en rueda de prensa que con esta declaración protéxense también como BIC un conxuntu de 30 bienes muebles destacaos, vencayaos directamente al Palaciu y la so capiella.

El Palaciu de San Román ye ún de los conxuntos monumentales d'arquitectura señorial más destcaos y de los meyores conservaos de tol Oriente asturianu. Construyíu ente los sieglos XVII-XVIII, dientro del periodu barrocu, ye un complexu formáu pol Palaciu, la capiella -unida a la casa al traviés d'un corredor-, les cuadres y los payares. Entovía se conserven igualmente y ensin grandes alteraciones, l'entornu del Palaciu, qu'ocupaba una propiedá señorial compuesta por finques, tierres de llabor, pumaraes, güertes y praos.