Decenes de docentes d'asturianu van movilizase énte la posibilidá de perder el trabayu

L'incumplimientu de la Llei d'Usu, la precariedá y la falta de la especialidá docente condicionen la enseñanza del asturianu.

La Conseyería d’Educación plantega reducir un 76 por cientu les medies xornaes en Llingua Asturiana: 120 places a tiempu parcial convertiríense en 60 a xornada completa, una midida que se recibe ente l’allegría pola dignificación que supón pal puestu de profesor d’asturianu al meyorar la situación de precariedá que supón la media xornada y el mieu a una perda importante del emplegu al reducise'l númberu de persones que podríen trabayar, lo que dexaría ensin la so plaza d'interinidá a decenes de persones.

La falta de la especialidá docente y el non cumplimientu de la Llei d’Usu y Promoción del Bable/Asturianu provoca la inestabilidá de los maestros y maestres de Llingua Asturiana y Gallego-asturiano. Si, como manda la Llei d'Usu, l'asturianu tuviera presente na educación Infantil en tolos centros y en Secundaria en condiciones de voluntariedá el problema sedría mui diferente.

Les medies xornaes, una opción qu’Educación debería utilizar de manera esceicional, ye la norma nel casu de la materia, con unos profesionales que nun pueden opositar nin optar a plaza.

L’anuncia del xueves a la Xunta Personal Docente d’un plan pa menguar les medies xornaes al 50 por cientu combinando places asitiaes a menos de 15 quilómetros pa consiguir un horariu completu itinerante recibióse, de primeres, bien ente los docentes. Un bon puntu d’iniciu pa la negociación.

Nel casu de la Llingua Asturiana, pol escesu de medies xornaes, la previsión ye que s’algame una mengua del 76 por cientu. Crearíense 60 completes, que saldríen de 120 medies actuales, y quedaríen 36 profesionales a tiempu parcial.

Sicasí, la situación particular del asturianu y la precariedá de l'asignatura lleva a que sía tamién la única asignatura que s’atope con un problema real a nivel d’emplegu, yá que mientres que los docentes que consigan plaza completa van meyorar y dignificar les sos condiciones de trabayu, parte del colectivu de profesores qu'agora tán trabayando a media xornada non sólo nun van acceder a la plaza completa, sinón que perderíen el so puestu de trabayu cola reducción de places pa crear xornaes completes.

La situación ta llevando a estos profesores a entrugar a los sindicatos pola so situación y a movilizase, cola previsión de que se convoque una asamblea de docentes de l’asignatura nos díes próximos.

Na semeya, la conseyera Lydia Espina nuna visita al CP Xovellanos de Panes la selmana pasada.