Debate n'Uviéu ente Pio Moa y historiadores asturianos

El polémicu escritor Pío Moa, que defende nes sos tesis que la Guerra Civil entamóla la izquierda, enfréntase esta tarde n'Uviéu nun debate col historiador del comunismu Francisco Erice y col decanu de la Facultá d'Historia José Girón.

Pío Moa ta de xira per Asturies estos díes pa presentar el so llibru llibru "1934, empieza la Guerra Civil, el PSOE y la Ezquerra emprenden la contienda" Ayeri, nel actu de presentación nel Atenéu Xovellanos de Xixón, el polémicu autor soltó delles frases pa la galería y espunxo la cadarma de la so teoría, pola que "El Partíu Socialista y la Ezquerra (como llama elli a Esquerra Republicana de Catalunya) pretendíen "acabar col gobierno llexítimu de la derecha y llantar un sistema soviéticu". Ello sofitaríase en "documentos y datos" que l'escritor diz que tien nel so poder. Siguiendo la so llinia de pensamientu, la conspiración ente socialistes y "la ezquerra" fracasó y namás cuayó n'Asturies gracies a l'ayuda de "los anarquistes". Na so charra, Moa concedió-y a Franco, encargáu de derrotar militarmente la Revolución del 34, el beneficiu de "respetar la democracia cuando pudo poner, yá d'aquella, una dictadura si quixere". Moa echó tamién peles campañes de recuperación de les foses comunes de la Guerra Civil, argumentando que "ye facer política cola historia" y que "escaecen les víctimes del otru bandu y les víctimes de la izquierda asesinaes pola mesma izquierda".

Semeyantes tesis , que munchos historiadores nieguen dafechu pero que-y valieron a Moa pa vender más de 150.000 exemplares del so llibru anterior "los mitos de la Guerra Civil" van enfrentase esta tarde a les de dos historiadores que tan opuestos dafechu a les idees del escritor gallegu. Francisco Erice, profesor d'Historia contemporánea na Universidá d'Uviéu y el decanu d'esta mesma facultá, José Girón, van participar nun debate que va facese a les 8 d'esta tarde nel Club Prensa Asturiana (C/Calvo Sotelo 7 - Uviéu) col autor de "Los mitos de la Guerra Civil".

El profesor Francisco Erice, que ye ún de los coordinadores de la obra "Los comunistes n'Asturies 1920-1977" y escritor de munches obres sobre la burguesía asturiana, ye tamién un gran conocedor de la Revolución del 34, mientres que'l decanu de la facultá d'Historia, José Girón, tien estudiao la historia de la UXT, amás de ser un gran espertu de la historia moderna de centroeuropa y los balcanes.

L'actu ye d'entrada llibre, pero amás va poder siguise al traviés d'una tresmisión en directu pel portal n'internet del periódicu La Nueva España.