De Miguel, Wolfe y Quintana van actuar n’Uviéu y Xixón esta selmana

Jacobo de Miguel, Michael Lee Wolfe y Mapi Quintana van llevar a Uviéu y Xixón la so propuesta qu’amiesta jazz y música tradicional. La primer cita va ser el miércoles, nel Centru Cultural uviedín Caxastur San Francisco, a les 20 hores.
 
Mentes, los xixoneses van poder sentir a esti tríu’l xueves, a la mesma hora, nel Pabellón Caxastur del Recintu Ferial Luis Adaro (FIDMA). De Miguel, Wolfe y Quintana faen una música “pa los amantes de la música tradicional, los aficionados de jazz y los que siguen las corrientes internacionales nueves”. El primeru, pianista de nivel y ‘jazzman’ contrastáu, ufre’l so virtuosismu y rigurosidá, mentes que’l músicu d’orixe norteamericanu suma a esta combinación la so esperiencia nel folk. La voz de Mapi Quintana, tamién compositoria y arreglisa, completen esti cóctel de música onde l’asturianu tien protagonismu.
 
“Tovía queden munches cosas por facer col cancioneru tradicional, munchos cantares que texer y conceutos nos que la música improvisada, el folk, la tradición y la creación vanguardista xuniránse creando soníos nuevos”, señalen los artistes. Los interesaos en sentir esta propuesta musical nueva van tener entrada de baldre a los dos conciertos hasta completar l’aforu de los recintos.