Datos elléctricos

La selmana pasada ficiéronse públiques delles estadístiques sobre la producción eléctrica del país que vienen a afitar la dependencia cada vez mayor que tien la economía astur de la industria xeneradora de corriente, que suel aportar sobre'l 7% del PIB asturianu. Según se fizo público, la producción d'Hidroeléctrica del Cantábrico, la principal eléctrica del país, xubió abondo y tuvo cásique raspiando'l récord de producción del añu 2.000. Ello confirma la posición asturiana ente los primeros productores de corriente de la península, ello amás cuando tan entamándose delles actuaciones en plantes de producción como los parques eólicos que tan almitíos a trámite y les nueves centrales térmiques d'HC en Ribera y Aboño.



Por supuesto, Asturies nun da abastu pa consumir toa esta corriente, y, como ye tradicional, más de la metada de los kwh que se produxeron salieron p'abaxo del Payares al través de les llinies d'alta tensión, que yá tan estragaes y precisen de refuerzos comno les paralizaes Lada-Velilla y Soto-Penagos. En concreto, el 55% de la corriente producía n'Asturies salió p'afuera, un datu na llinia xeneral de tolos años.



Otramiente, La Fundación de la Energía del Principáu asoleyó un estudiu esplicando les fontes enerxétiques que se consumen na industria eléctrica astur, resultando del informe que'l 75% de la corriente que se produxo nel 2.002 n'Asturies salió del carbón. Asturies estrémase nesto del restu del estáu, onde lo normal ye que'l carbón nun aporte nin la tercer parte de la enerxía y que seya, por contra, el petróleu el que ponga sobre'l 50% de los recursos enerxéticos, qu'amás tienen un repartu de consumos mui diferente al nuestru. Mientres n'Asturies la industria eléctrico ye'l primer consumidor de recursos con diferiencia, na media española ocupa esi puestu el tresporte, gran consumidor de gasolio y otros hidrocarburos.