Darréu recupera'l conciertu 'Asturies nun escaez'

Con motivu del décimu aniversariu de la organización y del octoxésimu de la Revolución d'Ochobre, Darréu recupera'l conciertu 'Asturies nun escaez'. Avientu podría ser la sorpresa de la cita, que va tener como sede Uviéu.

Les feches previstes pa la celebración del Día de la Moceda Revolucionario (DMR) son el 17 y 18 d'ochobre. Según señalen dende Darréu, va caltener una vertiente doble, "la formativa, divulgativa, de concienciación, reivindicación etc., al traviés de delles charres, alderiques, y otres actividaes, asina como’l clásicu conciertu 'Asturies Nun Escaez'", que dexó d'entamar nel añu 2011 tres la decisión del Conceyu de Llangréu d'impedir la so celebración la xornada enantes del eventu.

Tovía nun se conoz el cartelu del conciertu, anque una de les sorpreses que tien previsto la formación moza independentista podría ser la reunión sobre los escenarios de la histórica banda de folk-rock Avientu, que según s'anunció nes redes sociales tien previsto un conciertu pal 18 d'ochobre n'Uviéu, mesma fecha y llugar nel que ta anunciáu'l 'Asturies nun escaez'. Precisamente los de Riosa participaron na primer edición del conciertu, no que foi la so cabera acutación, entamada por Andecha Mocedá nel 2000 en Noreña y na que tamién tocaron OI! N'Ast, Intolerance, N'Arba y los vascos Betagarri y Etsaiak.