Darréu da a conocer el programa del Día de la Mocedá Revolucionario
|
10 Ochobre, 2011 por Pablo R. Guardado
- Inicie sesión o rexístrese pa espublizar comentarios
Llangréu va ser sede del DMR 2011 los díes 21 y 22 d'esti mes col propósitu de facer alcordanza de la Revolución d'ochobre del 34. El sábadu, en Sama, va celebrase'l tradicional conciertu, pal que yá tán confirmaos Escuela de Odio y IRA.
"Una vegada más, dende la organización de Mocedá Independentista Revolucionario-Darréu queremos facer alcordanza de la Revolución Asturiana d'ochobre del 1934 y, al empar, facer d'estes xornaes un marcu reivindicativu dende una perspectiva xuvenil, tresformadora y soberanista", espliquen. Asina, como n'años anteriores, Darréu va desarrollar una serie d'actividaes qu'esti añu pasen a tener llugar na Casa los Alberti, en Ciañu, y nel colexu públicu José Bernardo, en Sama.
Pa les 18 hores del vienres, día 21, va abrise'l Día de la Mocedá Revolucionario na Casa los Alberti con un actu al que va siguir, alredor de les 18.15 hores, una proyeición d'un documental autoxestionáu. Tres el mesmu, el sindicalista Cándido Carnero va protagonizar una charra-alderique entitulada como 'Reflexones sobre'l movimientu obreru asturianu d'ayeri y güei', pa terminar, a les 20 hores, con un alcuentru internacionalista colos representantes de les organizaciones convidaes de fuera del país. Yá pela nueche, l'actividá va pasar a Sama, onde va celebrase un amagüestu amenizáu con música asturiana.
El sábadu, día central del DMR, l'actividá va principiar al meudía con unos xuegos tradicionales y una xinta popular, prevista pa les 14 hores. A les 17 hores va facese un mural conmemorativu y, a les 18 hores un homenaxe a los revolucionarios d'ochobre nel monolitu-homenaxe a Belarmino Tomás, a la que va siguir una marcha hasta la Casa Conceyu de Llangréu. Por último, a les 20 hores va principiar el conciertu 'Asturies nun escaez', que cumple'l so décimu aniversariu. Nesta ocasión, Darréu va apostar polos grupos asturianos y, pel momentu, yá confirmó la presencia d'Escuela de Odio y d'IRA.
Efrén d'Andrés
Lo + visto de la selmana
Comentarios
¿Sabéis, nenos, qu´hai muncha más hestoria del país del 34 pa tras? ¿Sabéis que si un nacionaliegu, asturianista, etc. fala de fechos notables de la nuesa hestoria anteriores a 1934 ye calificáu -nel intre- de nazi pocu más o menos? ¿Qué receición algamó Vilareyo, Neville, Fundación Belenos, etc. ente les vuestres files? ¡Denguna! Ensiguida tenéis los calificativos a piques de chiscar: nazi casposu, esencialista, chifláu, friki. Pa muestra pongo un botón: cola espublización de la noticia "Los ámbitos de la nación asturiana (2008) : l´entamu del nacionalismu asturianu", en Kaoselared (órganu prósimu a la vuesa ideoloxía) milenta comentaristes llamen "nazi" y otres coses peores a un importante teóricu del nacionalismu asturianu. ¿Ye esa la democracia participativa vuestra, ye esi´l proyeutu de nación pol que puxáis? ¡Una Albania tres la Cordalera Cantábrica! Lo malo ye que les uebs informatives y dellos blogues vos dan cancha, masque nun llegáis a la xente, digáis lo que digáis. Apellando nazi y casposu al que reivindique a don Pelayu, la Santina, el Reinu, la Xunta Xeneral, la Territorialidá (Lleón, Asturies de Santillana , etc como países asturianos), etc. faciendo too eso y gastando al empar un discursu, por embargu, calcáu del PCPE y de Bildu, táis faciendo un escuálidu serviciu a la nación. Más bien paez que vos dirixen como marionetes. Ensin ánimu d´ofender, oístis, siendo constructivu vos digo esto, pa qu´estudiéis un migayu los dos mil años que precedieron a Belarmino Tomás.
Y por eso anden tan solos mientres que Cascos saca votos a puñaos.
Dalgunos tienen el reló paráu nel 34. Yo ya nin me molesto, nun tienen igua y el tiempu y los resultaos electorales van poniéndolos en so sitiu.