Darréu celebra esti sábadu’l Día de la Mocedá Revolucionario

|

Uviéu va acoyer esti sábadu les actividaes del Día de la Mocedá Revolucionario qu’entama Darréu tolos años pa facer alcordanza de la Revolución d’ochobre del 34. Mentes, Andecha Astur va homenaxear el vienres a Belarmino Tomás.

Una concentración frente al monolitu d’alcordanza d’Aida la Fuente, nel parque de San Pedro los Arcos, va dar aniciu a la xornada a les 13 hores, pa, media hora más tarde, celebrar l’actu políticu central coles intervenciones de militantes de Darréu. A les 14.30 hores va principiar la xinta popular, amenizada por música del país. Nesta ocasión, la organización independentista nun entama’l tradicional conciertu ‘Asturies nun escaez’, anque señala que nun renuncia a la celebración de más actividaes a lo llargo del mes, como la yá confirmada ellaboración d’un mural conmemorativu.

Hai que recordar que l’añu pasáu, la negativa de la socialista Esther Díaz, daquella alcaldesa de Llangréu y anguaño conseyera de Bienestar Social y Vivienda, de ceder l’usu del Colexu Públicu José Bernardo dos díes enantes de la fecha del conciertu obligó a Darréu a suspender el mesmu pese a que yá taba too organizáu y había decenes d’entraes vendíes pa ver a Escuela de Odio, IRA, Skama la Rede, Skontra, Adizión Etílika y Taranus. Nesta ocasión, la organización moza nun celebra’l ‘Asturies nun escaez’, anque anuncia que sofita’l conciertu solidariu colos represaliaos nel conflictu mineru entamáu pola Corriente Sindical d’Izquierda (CSI) el 20 d’ochobre na xixonesa sala Buddha (19 hores, 10 euros). Nél van actuar los catalanes KOP y les bandes asturianes IRA, Odio Visceral, Tragic Vision y Officer Down.

Actu nel cementeriu de Pando

Andecha Astur va entamar esti vienres un homenaxe a los revolucionarios asturianos del 1934 nel cementeriu de Pando, en Llangréu, alredor de la figura de Belarmino Tomás, presidente del tercer comité revolucionariu que pautó la rendición énte l'Exércitu de la República española y, trés años depués, del Conseyu Soberanu d'Asturies y Lleón fasta la so derrota poles tropes ‘nacionales’. “Belarmino Tomás personifica la llucha del pueblu trabayaor asturianu” pola “llibertá y el socialismu”, a la que namái “la represión militar del exércitu español, primero de la República y llueu del franquismu”, pudo poner torgues, afirmen dende Andecha. L’actu, contrapuntu al oficial ‘Día de la Hispanidad’, va tener llugar a les 13 hores y, darréu, los presentes van celebrar una xinta popular en La Felguera.

 

Comentarios

Al asturianismu/nacionalismu matáronlu dende dientro un pequenu garrapiellu d´elementos radicales, comunistes y anti-sistema que, por inocencia o dirixíos con mala fe, frañaron tou intentu de xuntanza al rodiu de la llingua y la identidá nacional. Tenemos que faer un analís d´esos "quintacolumnistes" (voluntarios o non) que desacrediten tolos díes la reivindicación asturiana, que nun tien na que ver colos independentismos nin colos comunismos "bable-gaita" que anecien n´asoleyar en cuatro blogs, masque ausentes dafechu nes cais del país. Esi radicalismu virtual -como´l de los Conceyus Abiertus, darreus, zapicus y cubeirus, ye namás verbal e contraproduciente, y sirve pa venceyar mentalmente el nacionalismu a una cosa de guah.es y de hooligans. Nun hai nacionalismu yá sacantes el tuiter y los blogues andechizaos. Y eso ye de pena.

La verdá ye qu'estos asturianistes del pingón non s'enteren de nada. Depués non son entender por qué la xente non quier saber un res d'ellos. Non fain ma falsificá-la hestoria. Agora va resultar que la socialistada del 34 (la mayor alienación de tola nuesa hestoria) yera asturianista y patriótica. Esos internacionalistes carniceros que mandaben la xente a morrer a bálamos facíenlo por Asturies! Belarmino Tomás pá de la patria! Amás llibertá y socialismo... como se foren compatibles. Plasmo llendo estes babayades.

Contador Estadistiques