Danone ábrese a vender la planta de Salas

La condición ye que sía un inversor solvente.

Los trabayadores de la fábrica de Danone en Salas garren aire depués de que la compañía confirmara que ta abierta a vender la factoría. La intención de la empresa de capital francés ye recolocar, prexubilar o pagar indemnizaciones a los 79 emplegaos, pero esta posibilidá abre un filu d'esperanza pa que l'actividá siga y, con ellos, los puestos de trabayu.

Danone pon como condición pa esta alternativa nueva que l'inversor que se faiga cargu de la instalación sía solvente. Dende'l comité d'empresa reclamen que s'esixa al comprador que dea prioridá a los actuales trabayadores a la hora de facer les contrataciones.