D’Andrés va dar una revolada a la diversidá llingüística mundial na charra mensual d’Ástura

Media hora más tarde del horariu habitual, esti martes va celebrase la charra mensual d’Ástura nel Atenéu Obreru de Xixón. Nesta ocasión el convidáu ye Ramón d’Andrés, filólogu que va dar una revolada a la diversidá llingüística mundial.

 

Baxo’l títulu de ‘La diversidá llingüística: una revolada pel planeta de les 5.000 llingües’, D’Andrés “va facer un percorríu pel fenómenu de la diversidá mundial de llingües como fechu consustancial a la historia y esencia de la Humanidá”, espliquen dende l’asociación cultural. Tres d'esta diversidá descúbrese que “les llingües actuales son el resultáu d'esgayase otres falaes antiguamente, conformando un formidable árbol xenealóxicu a escala mundia”. Tamién va afondar nel paisaxe llingüísticu d'Europa, frutu de trés grandes foles a lo llargo de la historia, siendo la mayoritaria d'elles la indoeuropea, “que xunce llingüísticamente Islandia con Ceilán, o Nepal con Asturies”. “Les llingües actuales de la Península Ibérica son el reflexu d'un pasáu al empar compartíu y individualizáu”, fina l’anuncia d’Ástura.

 

Poro, les persones que s’averen al llar del Atenéu Obreru de Xixón (Cuadonga, 7) –nesta ocasión a les 20 hores– van poder sentir un charra perinteresante, como toes les que suel protagonizar D’Andrés. Esti profesor titular de Filoloxía Española y Asturiana na Universidá d’Uviéu, fíu de Mánfer de la Llera, tien una trayeutoria destacada dientro de la llingüística a nivel internacional, con decenes d’espublizaciones y artículos. Amás, ye presidente de la Fundación Caveda y Nava, y coordinador del Seminariu de Filoloxía Asturiana de la Universidá d’Uviéu.