Dùn Èideann alcuerda con Londres celebrar el referéndum sobre la independencia d’Alba nel añu 2014

El ministru principal escocés, Alex Salmond, y el primer ministru británicu, David Cameron, alcordaron una fecha pal referéndum sobre la independencia d’Alba. Ésti va celebrase nel 2014 y va plantegar una sola entruga.

La pregunta concreta nun se desveló, pero será un sí o un non sobre Alba como nación llibre y independiente del Reinu Xuníu, y nun propondrá una mayor autonomía. Na votación podrán participar tolos escoceses mayores de 16 años y el resultáu será acatáu por Londres, según confirmó’l primer ministru británicu.

Tres la firma d’alcuerdu ente Dùn Èideann/Edinburgh y Londres, Cameron tuvo pallabres de respetu pal pueblu escocés que, nes urnes, dio’l trunfu al Pàrtaidh Nàiseanta na h-Alba (Scottish National Party), formación que plantegaba la consulta sobre la independencia del país nel so programa, y aseguró que va tar sollerte pa que sía “decisiva, llegal y xusta”. Esta posición de Londres ye radicalmente opuesta a la que t’amosando anguaño Madrid cola reivindicación democrática de Catalunya de siguir un procesu asemeyáu al escocés. La consulta al pueblu catalán sobre la independencia del país mediterraneu va ser una de les propuestes principales de Convergència i Unió (CiU) –partíu nel Gobiernu– nel so programa eleutoral pa les eleiciones anticipaes del 25 de payares tres l’ésitu de la manifestación de la Diada Nacional de Catalunya entamada pola Assemblea Nacional Catalana. 

Na semeya, David Cameron y Alex Salmond.