Cúmplense diez años del accidente del Pozu Nicolasa

Mañana 31 d'agostu ye'l X aniversariu del accidente
tráxicu que-yos costó la vida a 14 trabayadores nel Pozu Nicolasa
d'HUNOSA n'Ablaña, Mieres. Tres d'esti accidente HUNOSA tuvo que
replantegase les midíes de seguridá y los sistemes de producción
nes sos mines.



Na memoria de la mayoría de los mierenses ta afitada una fecha
triste y histórica, 31 d'agostu de 1995. Esi día, nel Pozu
Nicolosa de la empresa Hunosa, morrieron 14 trabayadores, 10 asturianos y 4 de
nacionalidá checa pertenecientes a una subcontrata cola empresa Vokd-Ostrava, que paradóxicamente tenía daquella medios tecnolóxicos muncho
más adelantaos de los qu'utilizaba HUNOSA n'Asturies. Precisamente, la meyora y
renovación de los medios tecnolóxicos y l'aumentu de les
midíes de seguridá nes mines asturianes foron una de les
consecuencies d'aquel accidente. Esta midida xustificóse tamién
polos datos tremendos que se taben dando nel sector nel 95, y ello ye que solo naquel
añu perdieron la vida 26 persones nos pozos asturianos, lo que
colocó a la minería como'l sector con más
siniestralidá d'Asturies.

Les causes del accidente tardaron en conocese y l'informe pericial que les apautó tardó cinco años en redactase, mientres munchos de los afectaos, sectores sindicales y voces independientes acusaron de neglixencia grave a la empresa. Ello ye que nel planu xudicial les consecuencies de la traxedia entovía nun tan resueltes, como se conoz pola sentencia d'esti mes de xunu pola que'l TSXA
falló a favor de cuatro de les viudes del accidente, que pidíen
l'aumentu nún 50 % na pensión de viudedá. D'esta manera'l
tribunal, como yá pasó n'otres sentencies, responsabilizó
en parte a la empresa del accidente considerando que les midíes
preventives tomaes pola empresa minera estatal nun foron suficientes, y que
les condiciones de trabayu na galería influyeron nel desastre por
dalgún presuntu incumplimientu empresarial.



El Conceyu de Mieres va recordar la fecha y a los trabayadores muertos
con un actu cenciellu énte'l Monumentu al Mineru a les 17:00 hores.
Tolos grupos políticos del Conceyu van participar nesti actu onde la
memoria de los mineros desapaecíos van ser la única protagonista.