Cúmplense cien años del nacimientu de Mánfer de la Llera

|
'Nueche abegosa'

El 7 d’abril del 1918 nacía en Les Cuestes Manuel d’Andrés Fernández, más conocíu pol so alcuñu lliterariu, Mánfer de la Llera. Pa recordar la figura d’ún de los escritores en llingua asturiana más destacaos del sieglu XX espublizamos una serie de viñetes feches pol so fíu Efrén basaes nel so cuentu ‘Nueche abegosa’.

Esta historia apaez nel so quintu llibru ‘Coses vivíes’, espublizada por Alborá nel 1998, y tamién na antoloxía lliteraria ‘En cata de la mio lluna’ (Trabe) qu’asoleyó’l Gobiernu con motivu de la Selmana de les Lletres Asturianes del 2011, que tuvo dedicada al llangreanu que, tres una época en Madrid, marchó a vivir a Xixón nel 1964, estableciéndose nes populares 1.500, nel barriu de Pumarín. Ehí, tres la so xubilación de la mina nel 1967 por silicosis, participó nel movimientu vecinal impulsando la creación de l’Asociación de Vecinos Severo Ochoa y nel de los pensionistes, amás de ser presidente de Conceyu Bable y miembru correspondiente de l’Academia de la Llingua Asturiana hasta la so muerte, ayeri hai 13 años.

‘Cuentos en verso asturiano’ (1953) foi’l so primer llibru, tres dase a a conocer como escritor de monólogos humorísticos y poesía costumista. Depués vendríen ‘Cielo bajo tierra’ (1982) y ‘Garrapiellu lliterariu asturianu’ (1983) y ‘Cabalgando sol tiempu’ (1990), amás del citáu ‘Coses vivíes’, nes que combinó la prosa y el versu.

Doce viñetes

Efrén d’Andrés, fíu de Mánfer de la Llera y hermanu de Ramón y Vital, dibuxó la historia ‘Nueche abegosa’ en vida del so padre, creación entovía ensin espublizar. Con motivu del centenariu del so nacimientu, el profesor de FP y dibuxante aficionáu con más de 30 años de trayeutoria va ufrir cada selmana n’Asturies.com una entrega de les doce que componen esti cuentu n’homenaxe a ún de los grandes nomes de la lliteratura asturiana.

Contador Estadistiques