Cúmplense 20 años del Asturies-Macedonia del Carlos Tartiere

El sábadu 23 d’avientu del 2000 la seleición asturiana absoluta de fútbol tornaba a formar nun campu seis décades depués. 25.000 persones axuntáronse nel Carlos Tartiere Nuevu pa presenciar la victoria d'Asturies por 1-0 con Macedonia gracies a un gol de guapa execución de Juanele del qu’esti miércoles se cumplen 20 años.

Esteban; Manel, Muñiz, César, Sietes; Manjarín, Mario, Angulo; Juanele, Oli y Luis Enrique foi l’once inicial del combináu nacional asturianu, con Díaz Novoa nel bancu. Un equipu de munchu nivel que superó a Macedonia –anguaño Macedonia del Norte tres un conflictu pol nome con Grecia– por un tantu solitariu que llevó la llocura a un Tartiere que presentó un gran coloríu con numberoses banderes asturianes, rescamplando’l fondu d’animación que se formó, y se respigó col himnu d’Asturies.

Juanele nel 47, nuna bona xugada dende la izquierda, sacó un duru disparu cruciáu énte’l que nada nun pudo facer el meta visitante. Magar ser un partíu amistosu, tanto Asturies como Macedonia, país qu’algamó esti añu billete pa la Eurocopa, amosaron un bon nivel de xuegu, confirmándose los macedonios como’l meyor rival de la seleición nesta etapa na qu’Asturies tamién s’enfrentó a Lituania (6-1 n’El Molinón) y a Hondures (5-3 nel Suárez Puerta) depués de 64 años ensin competir.

Dende’l partíu n’Avilés, nel 2002, nun volveríamos a disfrutar más d’un combináu de xugadores profesionales de fúbol defendiendo la camiseta azul con franxa mariella pola pasividá de la Federación y el Gobiernu. Sí que l’Executivu sofitó la celebración de partíos de balonmanu, ḥoquei patinos o balon voléa nos años posteriores, con bona respuesta del públicu en toles cites.