Cultura tramita la declaración de Bien d'Interés Cultural pa Santiago d'Arlós

La Conseyería de Cultura ta tramitando l'espediente pa la declaración como Bien d'Interés Cultural (BIC) con categoría de monumentu de la Ilesia de Santiago d'Arlós en conceyu de Llanera, alcontrándose en trámite d'información pública'l procesu nesti intre.


La Ilesia parroquial de Santiago d'Arlós data del sieglu XII, siendo ún de los clásicos del románicu rural asturianu y tando venceyada a les peregrinaciones a Compostela. Asitiada nun altu xunta'l cementeriu del pueblu y acompañada del árbol sagráu de los astures, el texu, esta ilesia rescampla ente les demás amueses del románicu rural asturianu al dicir de dellos estudiosos pola calidá de la so decoración escultórica. Con too y con ello, el tiempu dexó la so marca nel templu, qu'anque caltién de la so fábrica orixinal la nave y el testeru, tien dos capielles venceyaes a esti y una espadaña na entrada que son amestadures del tiempu del barrocu. A últimos de los 90, la ilesia de Santiago d'Arlós remocicóse en parte, retirándose la carga de la fachada pa dexar la piedra al aire.